“Türklər tarixi işarələrlə qayalara, xalçalara həkk edirdilər” - VİDEO
Qərbi Azərbaycan Xronikası layihəsi çərçivəsində sənətşünaslıq üzrə fəlsəfə doktoru Elçin Əlibəylinin təqdimatında “İrsimiz” rubrikasının növbəti buraxılışı hazırlanıb.
Rakus.az xəbər verir ki, “Türklər yaşadıqları hər yerdə qaya üstündə təsvir yaradırdılar” adlı buraxılışda sənətşünaslıq üzrə fəlsəfə doktoru Türkan Abbaslı türklərin yaratdıqları təsvirlərin mənasından söz açıb.
O bildirib ki, türklər tarixi işarələrlə qayalara, xalçalara həkk edirdilər. Türklər təbiəti şüurlu varlıq kimi qəbul edirdilər. Türklər yaşadıqları hər yerdə qaya üstündə təsvir yaradırdılar.
Onun sözlərinə görə, qartal ilahi qüvvələrin xəbər elçisi hesab olunurdu və tenqriçilik tək yaradana inam idi.
Sənətşünaslıq üzrə fəlsəfə doktoru deyib ki, damğa təsvirlərinin düzgün istifadə etmədikdə bəd işlər baş verə bilər və hər işarəni evin içərisində qoymaq olmaz.
T.Abbaslı qam-şaman adətlərinin izahını verib, təsvirlərdə verilən heyvan obrazlarının mənası, insan dua edən vəziyyətdə heykəlin qoyulmasının sirri və göy cisimlərinin insan həyatına təsirindən söz açıb, qartal uçuşunun hansı ilahi xəbərin çatdırıcısı olmasına aydınlıq gətirib.
Xatırladaq ki, Qərbi Azərbaycan Xronikası layihəsinin məqsədi tarixi torpaqlarımızın adının yaşadılması, tanıdılması, həmçinin azərbaycanlıların ermənilər tərəfindən deportasiyaya məruz qoyulmasından, həmin ərazilərdə mövcud olmuş, lakin adı silinən toponimlərin, saysız-hesabsız yeraltı və yerüstü maddi mədəniyyət nümunələri – qədim yaşayış məskənləri, nekropollar, kurqanlar, qala, saray və istehkam qalıqları, karvansaralar, körpülər, qəbirüstü sənduqələr, xaçdaşlar, at-qoç heykəlləri, məbəd, kilsə, məscid, pir və ocaqların üzə çıxarılması, həmin ərazinin təmiz oğuz-türk məskənləri olduğunu təsdiq edən faktların dünya ictimaiyyətinə çatdırılmasıdır.
Həmçinin Prezident İlham Əliyevin Qərbi Azərbaycanla bağlı dediyi “XX əsrin əvvəllərinə təsadüf edən xəritə bir daha onu göstərir ki, Qərbi Azərbaycan tarixi Azərbaycan diyarıdır, şəhərlərin, kəndlərin adları Azərbaycan mənşəlidir və biz yaxşı bilirik ki, indiki Ermənistan ərazisində tarix boyu Azərbaycan xalqı yaşayıb. İndi əsas vəzifə ondan ibarətdir ki, dünya ictimaiyyəti də bunu bilsin”, – fikrini əsas tutaraq, Qərbi Azərbaycan İcmasının hazırladığı Qayıdış Konsepsiyasından irəli gələn vəzifələrin təbliğidir.
Bundan əlavə, Qərbi Azərbaycanla bağlı tarixçilərin, araşdırmaçıların düşüncələrini, deportasiyaya məruz qalmış şəxslərin həyat hekayəsini işıqlandırmaqdır.
Veriliş mayın 3-də saat 19:30-da Baku Tv-nin efirində və saat 21:30-da Youtube kanalında yayımlanıb.
