Türkmənistan Prezidenti Polad Bülbüloğlunu təbrik etdi
Türkmənistan Prezidenti Qurbanqulu Berdiməhəmmədov Azərbaycan Respublikasının Rusiya Federasiyasındakı fövqəladə və səlahiyyətli səfiri, Azərbaycanın və Türkmənistanın Xalq artisti Polad Bülbüloğluna 75 illik yubileyi münasibətilə təbrik göndərib.
Rakus.az xəbər verir ki, Türkmənistan lideri öz təbrik məktubunda Polad Bülbüloğlunun uzun illər ərzində ölkələrimiz və xalqlarımız arasında dostluq və qardaşlıq münasibətlərinin möhkəmlənməsinə böyük töhfə verdiyini qeyd edib. “Məhz buna görə Türkmənistanda sizə tanınmış bəstəkar və gözəl müğənni kimi böyük ehtiramla yanaşırlar. Sizin yaradıcılığınız türkmən xalqının qəlbində xüsusi yer tutur”, – deyə Q.Berdiməhəmmədov vurğulayıb.
Türkmənistan Prezidenti Polad Bülbüloğluna möhkəm cansağlığı, xoşbəxtlik və gələcək fəaliyyətində uğurlar arzulayıb. (Azərtac)
