Ülvi Mehdiyev: “YAŞAT”ın xərclərini hər kəs izləyə biləcək”
“YAŞAT” Fondunun platformasında şəhid ailələri və yaralılar barədə məlumat olacaq.
Rakus.az xəbər verir ki, bunu Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin (ASAN Xidmət) sədri Ülvi Mehdiyev bu gün “YAŞAT” Fondunun yaradılması ilə bağlı keçirilən məlumat konfransında bildirib.
Yeni yaradılan “YAŞAT” Fonduna müraciət edən şəhid və yaralıların ailələrinə dəstək göstəriləcək.
Onun sözlərinə görə, müraciət daxil olan zaman həmin şəxslərin evinə baş çəkiləcək:
“Əgər bir ay ərzində vətəndaşın ehtiyacını qarşılaya bilmiriksə, həmin ailə haqqında məlumat yerləşdiriləcək və vətəndaşlar onlara yardım edə bilərlər”.
Ü.Mehdiyev qeyd edib ki, hər bir ianə edən şəxsin platformada xüsusi kabineti olacaq və o, ödədiyi vəsaitin xərcləndirməsinə nəzarət edə biləcək.
“Belə desək, bu fond cəmiyyətin fondu olacaq. Hər kəs fondun fəaliyyəti, hesabatı ilə tanış ola və ianə edə bilər.
Xərclərin təyinatını hər kəs izləyə biləcək”, – Ü.Mehdiyev qeyd edib.
