Uşaqlara ən çox verilən sual budur: “Böyüyəndə kim olmaq istəyirsən?”. Çox uşaq da demək olar ki, bu suala ya həkim, ya polis, ya da müğənni olmaq istədiklərini bildirərək cavab verirlər. Amma mən bu yaxınlarda Ayxan adında bir yeniyetmə ilə həmsöhbət oldum. Ona bu sualı verəndə mənə digərlərindən fərqli cavab verdi. Verdiyi cavabı oxucularla bölüşmədən əvvəl sizlərə Ayxan haqqında kiçik bir məlumat verim:
Zeynallı Ayxan Zakir oğlu 2004-cü il oktyabrın 15-də dünyaya göz açmışdır. O, ilk təhsilinə Buzovna qəsəbəsindəki 33 saylı tam orta məktəbdə başlamışdır. Hal-hazırda təhsilini də elə həmin məktəbdə davam etdirir. Həmyaşıdlarından düşüncə tərzi, tərbiyəsi və savadına görə fərqlənən Ayxan müəllimlərinin sevimli şagirdi olmaqla yanaşı təhsil həyatında da indidən bir sıra nailiyyətlər əldə etmişdir.
Yuxarıda bildirdiyim kimi, Ayxanla həmsöhbət olduğum zaman həmin məşhur sualı ona ünvanladım. Cavabında böyüdüyü zaman müdafiə naziri olmaq istədiyini dedi. “Niyə məhz müdafiə naziri olmaq istəyirsən?” deyə soruşduğumda Ayxan belə cavab verdi:
“Vətənimiz Azərbaycanı canımdan çox sevirəm. Bu vətən uğrunda Mübariz İbrahimov kimi neçə-neçə igidlərimiz canlarından keçmişdir. Mən də böyüdüyüm zaman Vətənimizi canla-başla düşmənlərimizdən müdafiə etmək arzusundayam.”
Ayxanın bu cavabı məni, həqiqətən, çox heyrətləndirdi. Onun kimi yeniyetmələrin olduğunu gördükcə insan qürur və fəxarət hissi keçirir. Mən də bir daha Ayxana bundan sonrakı həyatında müvəfəqiyyətlər arzu edir və fikirlərimi də Ulu Öndər Heydər Əliyevin söylədiyi müdrik bir kəlamla bitirirəm:
“Uşaqlar bizim gələcəyimizdir. Gələcəyimizi nə cür tərbiyə edəcəyiksə, ölkəmizin, millətimizin, dövlətimizin sabahı da bundan asılı olacaq.”
