Xocalılar şəhid uşaqların parkını salıb - FOTO
Ötən əsrin ən faciəli hadisələri kimi tarixin qan yaddaşına çevrilən Xocalı faciəsini əbədi yaşatmaq üçün xocalılar daha bir nümunəvi addım atıb. Belə ki, 1992-ci ilin fevralın 26-da işğal olunan Xocalı rayonun bir sıra kəndləri dövlətin dəstəyi və vəsaiti hesabına onların məşkunlaşdığı yerlərdə müvəqqəti olaraq yenidən salınıb. Goranboy rayonunun təbiəti səfalı olan ərazilərinin bir hissəsi xeyli vaxtdır ki, Xocalı rayonunun ixtiyarına verilib. Əlahi sosial evlərdə məskunlaşıb.
Goranboy rayonundakı Xocalı rayonunun Meşəli qəsəbəsinin girəcəyində qeyri adi olaraq qandonduran mənzərə ilə qarşılaşırsan. Xocalı faciəsində şəhid olan bütün uşaqların xatirəsini əbədiləşdirmək üçün yaradılan parkda şəhidlərin hər birinin adına ağac əkilib. Ağacın yanındakı lövhədə isə şəhidin adı, soyadı, doğum və şəhidolma tarixi yazılıb. Kənd orta məktəbinin qarşısında və Ağcakənd istiqamətində yolun kənarında salınan park qanlı tariximizin əbədi salnaməsidir. Çünki bu şəhidlərin adına verilən ağaclar onların ruhunu yaşadmaqla düşmənin nə qədər qansız və vicdansız olduğuna əyani nümunədir.
Parkın salındığı vaxtdan başlayaraq Xocalı rayonuna və bu ərazilərə gedən bütün yerli və xarici vətəndaşlar şəhid uşaqlarının haray səsinin şahidi olurlar. Ağaca verilən şəhid uşaq ömrünü görən normal düşüncə sahibi çətin ki, faciə barədə əlavə suala ehtiyac duya. Çünki düşmən uşaqlara da aman verməyib.
Park məktəblilər üçün də tərbiyəvi və vətənpərvərlik baxımından mühüm əhəmiyyət kəsb edir. Ona görə ki, Xocalı faciəsinin qurbanı olan uşaqların taleyi göz önündədir. Bu mənada park siyasi, fəlsəfi, hərbi, beynəlxalq, sosial … dəyərlər baxımından böyük əhəmiyyət daşıyır və əbədi olaraq daşıyacaq. Çünki dünyada şəhid uşaqların parkı qandonduran mənzərəni xatırladır.
Mikayıl Nərimanoğlu
Baş redaktor, Əməkdar jurnalist
