Yuxusuzluq bunlarla müalicə olunur – MƏSLƏHƏT
Tibb çox böyük inkişaf yolu keçsə də, xəstəliklərin müalicəsi, ağrıların aradan qaldırılmasında təbii metodlar bu gün də tətbiq olunur.
Rakus.az xəbər verir ki, dünyanın əksər ölkələrində ağrılara qarşı bu gün də təbii vasitələrə əl atılır. Məsələn, Rusiyada yüz illərdir ki, boğaz ağrısı zamanı moruqdan istifadə olunur.
Ruslar moruğu boğaz ağrısının klassik dərmanı sayırlar. Moruğun tək meyvələri deyil, hətta yarpaqları təzə və ya qurudulmuş halda istifadə olunur. Onlardan dəmləmə, çay hazırlanır. Bir ovuc qurudulmuş moruq, bir stəkan qaynar suya tökülür, 5 dəqiqə qaynadılır. Bu çay udqunma zamanı yaranan ağrıları aradan qaldırır.
Məlumatlara görə, Finlandiyada uzun illərdir ki, qarağat suyundan dərman kimi istifadə olunur. Qrip, zökəm, soyuqdəymələr zamanı, ən çox da burunda axıntı varsa, ilk növbədə qırmızı, yaxud da qara qarağat suyu ağıla gəlir. C vitamini ilə çox zəngin olan qarağat belə məqamlarda faydalı təbii dərman sayılır. Bu, bədəndə iltihabı aradan qaldırır, allergik simptomları da azaldır.
Portuqaliyada quru öskürək zamanı bal və yumurtanın sarısı şəfa mənbəyi sayılır. 2-3 yemək qaşığı bal bir ədəd yumurtanın sarısı bir-birinə qarışdırılır və belə qəbul edilir.
Fransada yuxusuzluq zamanı lavanda bitkisi köməyə gəlir. Fransızlar bu ölkənin bitki örtüyünün çox önəmli hissəsini təşkil edən lavandanın yaxşılaşdırıcı gücünə hər zaman inanıblar. Onun sinir sistemini sakitləşdirən gücə malik olduğunu hər kəs qəbul edir.
Yaxşı yuxu üçün yastığın üzərinə bir neçə damcı lavanda yağı damcıladırlar, bu qoxu serotonin səviyyəsini artırır və yuxuya getməyi asanlaşdırır.
Misirdə baş ağrısı zamanı cirədən istifadə edilir. Cirədən əsasən qurudulmuş halda, ən çox da onun toxumlarından faydalanırlar. Ən çox baş və mədə ağrıları zamanı
cirə çayı içilir. Cirə mərkəzi sinir sistemi, beyin, həzm sistemi orqanlarını rahatladan təsirə malikdir. Yarım çay qaşığı cirə qaynar suya qatılır, 10 dəqiqə gözlədikdən sonra içilir. Ən çox başı və mədəsi ağrıyanlar bu çayı içirlər…
