Ziyafət Abbasov 85-ci baharına qədəm qoyur - VİDEO
Bu gün mədəni irsimizin inkişafında xüsusi xidmətləri ilə seçilən Azərbaycanın Əməkdar incəsənət xadimi Ziyafət Abbasov doğum günü qeyd edir. Ömrünün 85-ci baharına qədəm qoyan istedadlı rejissor ssenari müəllifi, baş redaktor, təcrübəçi rejissor, film direktoru, prodüser kimi də yetərincə tanınır.
Məlumat üçün bildirək ki, Ziyafət müəllim 1 oktyabr 1935-ci ildə Bakı şəhərində anadan olub. 1963-1968-ci illərdə M.A.Əliyev adına Azərbaycan Dövlət İncəsənət İnstitutunun rejissorluq fakültəsində təhsil alıb. 1968-1974-cü illərdə Azərbaycan Dövlət Televiziya və Radio şirkətində, 1974-cü ildən “Azərbaycanfilm” kinostudiyasında rejissor işləyib. “Mozalan” kinojurnalı üçün 34 bədii və sənədli süjet çəkmişdir.
Ziyafət Abbasov bir müddət “Azərbaycanfilm” kinostudiyasının nəzdində fəaliyyət göstərən kinoaktyor teatr studiyasının bədii rəhbəri olub, 1994-cü ildə kinostudiyaya direktor əvəzi təyin olunub, 1994-2001-ci illərdə “Azərbaycanfilm”in direktoru vəzifəsində çalışıb.
O, bütün bunlarla yanaşı yüzlərlə rejissora, senari müəllifinə, prodüserə müəllimlik etməklə onlara sənətinin incəliklərini öyrədib. Filmləri ilə mədəni irsimizi xeyli zənginləşdirib.
Rakus.az-ın yaradıcı kollektivi adından Ziyafət müəllimi səmimi qəlbdən təbrik edir, ona cansağlığı, uzun ömür arzulamaqla rejissoru olduğu qısametrajlı bədii filmlərdən birini təqdim edirik.
