Dilber Ay vəfat etdi - FOTO
Türkiyənin məşhur xalq mahnısı ifaçılarından olan Dilber Ay ötən gün ürəktutmasından vəfat edib.
Rakus.az axşam.az-a istinadən sənətçinin acı hekayəsini təqdim edir:
13 yaşında olarkən özündən yaşca böyük biri ilə evləndirilən Dilber türkülər ifa etdiyi üçün atası tərəfindən tövləyə bağlanıb, işgəncələrə məruz qalırdı.
Ona cinsi zorakılıq göstərmək istəyən adamı bıçaqladı və Almaniyada həbsxanaya salındı.
“Dəliqanlı, mərd qadınam. Məhkumlar da məni çox sevir. Taleyinə məhkum olmuş hər bir insan mənim övladımdır. Kimlər övladım deyil? – Uşaqlara təcavüz edənlər, sevgilisi üçün övladını öldürənlər, vətən xainləri… Onları asmaq lazımdır” deyə, Dilber müsahibələrində deyirdi.
O, daha sonra həyatını belə izah edirdi:
“Səsim yanıqlıdır, səmimi danışıram, ona görə məni sevirlər. Uşaqlığım qəribə keçib. Kasıb ailənin övladı idim. Kahramanmaraşda bir çadırda dünyaya gəlmişəm. Ailəm aşirətdən idi, köküm isə Hələbə gedib çıxır. Yoxsulluğun içində doğuldum amma, Rəbbimin mənə verdiyi səs sayəsində uşaqlarım çörək tapa bildi. Xoşbəxt uşaq deyildim. Kasıb insanın xoşbəxtliyi olarmı? Səkkiz övlad idik, ikisini itirmişdim. Üçüncü sinifədək oxumuşam, sonra da evləndirdilər. Məni yaşlı adamla evləndirdilər. Adət elə imiş. İki övladım oldu, sonra ayrıldıq.
Radiodan gəlib kənddə çadır qurmuşdular, gözəl səsləri dinləyəcəklər dedilər. Əmim qızı ilə qol-qola girib, getdik. Səsimi dinlədilər, birinci oldum. Evə gəldim. Evimiz cəhənnəm kimi idi. Bizi tövləyə bağladılar. Ətimizi tikə-tikə etdilər. Əmim, atam hamısı birləşdilər. Dedilər ki, sən necə türkü səsləndirə bilərsən?! Aradan beş il keçdi. Radioya getdim, “Nə olar, məni bir dəfə dinləyin” deyə, yalvardım. Qış ayları idi. Ayağımda qara qaloş, başımda şərf var idi. Elə bildilər ki, dilənçiyəm. Məni qovdular, içəridən bir adam gəlib “Bu tarixdə gələrsən, dinləyərik” dedi. Getdim, yenə qazandım. Amma pul qazanmaq lazım idi. Kazinolarda işləməyə başladım. Onsuz da boşanmışdım. Uşaqlarımın ruzisinin arxasınca qaçırdım.
Atam əvvəlcə razı olmadı, daha sonra atam məndən üzr istədi, hər şeyi yanlış anlamışam dedi. Sən demə, Dilber Ay adlı pornoulduz var imiş. Atama qızın belə filmlərdə çəkilir deyiblər. Onu öldür, namusunu təmizlə deyiblər. Sonra atam gedib filmə baxıb, görüb ki, bu aktrisa başqasıdır.
Çox pullar qazanmışam, amma yedim, içdim və gəzdim. 30 nəvəm var, uşaqlarıma, qohumlarıma mən baxıram. Hər şeyi gəli mənimlə məsləhətləşirəm. Gizli bir şey edəni cəzalandırıram.
Bir gün səhnəyə çıxmamışdan öncə, bir adam kulisdə mənə cinsi zorakılıq etməyə çalışdı. Masanın üstündə meyvə bıçağı var idi. Aldım adamı bıçaqladım, yoxsa namusum kirlənəcəkdi. Namusumu qorudum, səkkiz ay yatdım. İndi olsa, yenə də eynisini edərəm. İnsan namusunu qorumaqdan niyə peşman olsun ki?”
