Lavrov: “Qarabağ ətrafında geopolitik oyunlara qarşıyıq”
Rusiya Xarici İşlər naziri Sergey Lavrov Dağlıq Qarabağ ətrafında müxtəlif tərəflərin mümkün geosiyasi ambisiyalarının təzahürlərini şərh edib.
Rakus.az xəbər verir ki, bu barədə “RİA Novosti” agentliyi məlumat yayıb.
“Əgər birinci sıraya geosiyasi ambisiyaları qoysaq, heç bir şey edə bilmərik. Biz bu cür cəhdləri qətiyyətlə rədd edəcəyik və diqqətimizi bu bölgədə yaşayan xalqların təməl maraqlarına cavab verən razılaşmaların həyata keçirilməsinə yönəldəcəyik”, – rusiyalı diplomat qeyd edib.
Rusiyalı XİN başçısı Dağlıq Qarabağdakı üçtərəfli atəşkəs razılaşmasının bölgənin həm erməni, həm də azərbaycanlı əhalisinin maraqlarına cavab verdiyini vurğulayıb.
S.Lavrov əlavə edib ki, indi ən başlıca məqsəd insanların etnik mənsubiyyətindən və dini inanclarından asılı olmayaraq sülh və təhlükəsizlik şəraitində yanaşı yaşamalarıdır.
