Cocuq Mərcanlıda ilk Novruz şöləni - FOTO
Azərbaycanın 2017-cı ilin aprelində işğaldan azad olunmuş Cocuq Mərcanlı kəndində Novruz bayramı münasibətilə ilk şənlik keçirilib.
Rakus.az xəbər verir ki, insanlar yandırılan tonqalın başına yığışıblar. Tədbirdə şou-biznes nümayəndələri də iştirak ediblər.
Aparıcı Lamiyə Ələkbərovanın təşkil etdiyi konsertdə xaql artisti Mənsum İbrahimov, Mələkxanım Əyyubova, Gülyaz və Gülyanaq Məmmədova, Mübariz Tağıyev, əməkdar artist Vasif Məhərrəmli, Mətanət İsgəndərli, müğənnilər Nadir Qafarzadə, Ayaz Qasımov, aşıq Əli Tapdıqoğlu, rəqqasə Fatimə Fətəliyeva və başqaları yer alıblar.
Tədbirdə ilk olaraq Dədə Qorqud personajını canlandıran aktyor çıxış edib. O, Cocuq Mərcanlıdakı yenilikdən bəhs edib.
Bildirilib ki, erməni işğalından azad edilən Cocuq Mərcanlıda ilk dəfə Novruz konserti keçirilir.
Xatırladaq ki, 1993-cü ildə Ermənistan ordusu hücuma keçərək Cəbrayıl rayonunun bütün ərazisini ələ keçirib və kənd tamamilə dağıdılıb. Dörd ay sonra Azərbaycan ordusunun əks-hücumu nəticəsində Ermənistan ordusu kənddən çıxmağa məcbur olaraq kəndin ətrafındakı yüksəkliklərdə mövqe tutub. Atəşkəsdən sonrakı dövr ərzində kənd cəbhə zonasına çox yaxın yerləşdiyi üçün əhali ora qayıda bilməyib, burada cəmi bir nəfər – Oqtay Həziyev daimi yaşayıb. 2 aprel 2016-cı ildə Cocuq Mərcanlı kəndinə yaxın yerləşən Lələ təpəyüksəkliyi Dördgünlük müharibə zamanı Azərbaycan Ordusu tərəfindən işğaldan azad edilib.
Foto: İlqam CƏBİYEV (Axşam.az)
