Prokurorluq: Lerikdəki qətlin üstü hələ açılmayıb
Lerik Rayon Prokurorluğu rayon ərazisində baş verən qətllə bağlı açıqlama yayıb.
Rakus.az xəbər verir ki, açıqlamada deyilir:
“Aprelin 28-də saat 16 radələrində Lerik rayonun Barzavu kəndində 1981-ci il təvəllüdlü Fərziyeva Zəkifə Feyruz qızına məxsus üzərində xəsarət izləri olan meyitin yaşadığı evdə aşkar edilməsi barədə rayon prokurorluğuna məlumat daxil olub.
Cinayət prosessual qanunvericiliyinin tələblərinə əsasən, prokurorluq və polis əməkdaşları tərəfindən məhkəmə-tibb ekspertinin iştirakı ilə hadisə yerinə və meyitə baxış keçirilib, digər prosessual hərəkətlər yerinə yetirilib.
Faktla bağlı Lerik Rayon Prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb, müvafiq ekspertizalar təyin edilib.
Hazırda prokurorluq və polis əməkdaşları tərəfindən hadisənin təfərrüatlarını və cinayəti törətmiş şəxs və ya şəxslərin müəyyən edilərək tutulub istintaqa cəlb edilməsi istiqamətində intensiv və zəruri istintaq hərəkətləri və əməliyyat-axtarış tədbirləri davam etdirilir”.
Qeyri-aşkar vəziyyətdə qətlə yetirilən Z.Fərziyeva üç övlad anasıdır. Onun həyat yoldaşının Rusiyada yaşadığı bildirilir. O, Lerikdə kiçik oğlu ilə birgə yaşayırmış.
