Hərbi sahədə Azərbaycan-Gürcüstan münasibətləri – TARİXİ ASPEKT
Azərbaycan Respublikası Silahlı Qüvvələrinin Hərbi Akademiyasında Azərbaycanla Gürcüstan arasında hərbi-diplomatik münasibətlər qurulmasının 100 illiyinə həsr olunmuş “Hərbi sahədə Azərbaycan-Gürcüstan münasibətlərinin təşəkkülünün tarixi aspektləri (tarixi oçerk)” kitabı çapdan çıxıb.
Rakus.az xəbər verir ki, Bakı Dövlət Universitetinin Qafqaz xalqları kafedrasının müdiri, tarix elmləri doktoru, professor İradə Hüseynova, Azərbaycan Respublikasının Silahlı Qüvvələri Hərbi Akademiyasının adyunktur və elm şöbəsinin professoru, ehtiyatda olan birinci dərəcəli kapitan, tarix elmləri doktoru Nurulla Əliyev və professor Mamuka Qoqitidzenin birgə əməyi ilə ərsəyə gəlmiş kitabın mövzusunun seçimini 1918-1921-ci illərdə Azərbaycanla Gürcüstan arasında dövlət, o cümlədən hərbi-diplomatik münasibətlər tarixinin öyrənilməsinin və ümumiləşdirilməsinin aktuallığı şərtləndirib.
Geniş oxucu auditoriyasına təqdim edilən bu tədqiqat əsəri həmin mövzuya dair ümumiləşdirilmiş tarixi materialdır. Burada 1918-ci ilin mayında müstəqillik qazandıqları dövrdə Azərbaycanda və Gürcüstanda baş verən əsas hərbi-tarixi hadisələr işıqlandırılıb. Kitabda hərbi sahədə Azərbaycan-Gürcüstan əməkdaşlığının yaranması tarixinə xüsusi yer ayrılıb, Azərbaycan Xalq Cümhuriyyəti ordusunda xidmət edən və əslən gürcü olan 6 general, 64 böyük və kiçik zabit, habelə məmurlar barədə məlumatlar ilk dəfə sistemləşdirilmiş və ümumiləşdirilmiş şəkildə təqdim olunub.
Tədqiqat əsərində dost və qardaş Azərbaycan və gürcü xalqlarının tarixinin dramatik və eyni zamanda əlamətdar səhifələri, o cümlədən 1918-ci ildə müstəqilliyin əldə edildiyi dövrdə Bakı ilə Tiflis arasında hərbi sahədə diplomatik münasibətlərin qurulması tarixi həqiqi faktlar və hadisələr əsasında bütün dolğunluğu ilə canlandırılıb.
Kitab geniş oxucu auditoriyası, dövlətlərarası münasibətlər məsələlərini öyrənən tədqiqatçılar, habelə Azərbaycan Respublikasının ali humanitar məktəblərinin və xüsusi təyinatlı tədris müəəssisələrinin müəllim, tələbə və kursantları üçün nəzərdə tutulub.
