Gürcüstan hökumətində kadr dəyişiklikləri olacaq
Gürcüstan hökumətində kadr dəyişiklikləri olacaq. Bu məsələ artıq hakim “Gürcü Arzusu – Demokratik Gürcüstan” partiyasında müzakirə olunub.
Rakus.az xəbər verir ki, bu barədə Gürcüstan mətbuatı yazıb.
Məlumatlara əsasən, hazırkı Daxili İşlər naziri Qeorgi Qaxaria Baş Nazir, hakim “Gürcü Arzusu – Demokratik Gürcüstan” partiyasının siyasi məsələlər üzrə katibi, keçmiş Baş Nazir İrakli Qaribaşvili isə Daxili İşlər naziri təyin olunacaq. Hazırkı Baş Nazir Mamuka Baxtadzenin isə beynəlxalq maliyyə təşkilatlarının birində çalışacağı bildirilir.
Xatırladaq ki, Baş Nazir Mamuka Baxtadze dəyişikliklər barədə məlumatları şərh edərkən deyib: “Mən “Gürcü Arzusu” komandasının üzvü olmuşam və olacağam. Biz vahid komandayıq. Dəyişikliklərə gəlincə, bu, təbii prosesdir. Hökumət parlamentə yenilənmiş proqram təqdim edəcək və dəyişikliklər həmin proqramdan asılı olacaq. Biz nəticələrə hədəflənmişik. 2020-ci il seçkiləri ilə bağlı parlamentə proqram təqdim olunacaq. İstənilən kadr dəyişikliyi həmin proqrama əsasən həyata keçiriləcək”.
Parlamentdə çoxluğu təşkil edən fraksiyanın lideri Gia Volski hökumətdə dəyişikliklərin olacağını istisna etməyib.
Bəzi məlumatlara görə, hökumətdə kadr dəyişiklikləri yaxın bir ay ərzində baş verəcək.
