Bakıda Nevrologiya həftəsinin rəsmi açılış mərasimi keçirilib.
Rakus.az xəbər verir ki, tədbirdə çıxış edən Nevroloqların Milli Assosiasiyasının prezidenti Rəna Şirəliyeva konfransın işinə uğurlar arzu edib.
O, Nevrologiya həftəsi ərzində keçirilən tədbirlərdən danışıb. Sonra nevrologiya sahəsində xidmətləri olmuş şəxslər barədə məlumat verib: “Azərbaycan nevrologiyası artıq yüksək səviyyədədir. Biz nevrologiyanın sabahını gənc, etibarlı nevtoloqların əlində görürük”.
Daha sonra Azərbaycanda nevrologiya sahəsində xidmətləri olan həkimlər haqqında video-çarx nümayiş olunub.
Azərbaycan Tibb Universitetinin (ATU) rektoru Gəray Gəraybəyli bildirib ki, Azərbaycanda tibb elminə və təhsilə göstərilən diqqət və qayğı nəticəsində hər ay böyük elmi konfranslar və tədbirlər keçirilməkdədir: “Azərbaycanda tibb elminə və tibb sahəsinə göstərilən qayğı nəticəsində, demək olar ki, hər ay elmi konfranslar keçirilir. Bu tədbirlər nəticəsində görkəmli, məşhur alimlər Azərbaycana gəlir və onların gəlişi gənc həkimlərin təcrübə və yeniliklərə sahib olmaları üçün çox gözəl imkanlar yaradır”.
Ə.Əliyev adına Azərbaycan Dövlət Həkimləri Təkmilləşdirmə İnstitutunun rektoru Nazim Qasımov qeyd edib ki, Nevrologiya həftəsi Azərbaycanda bu sahədə çalışanları birləşdirir. O bildirib ki, bu gün dünya elmi multidisiplinar xarakter daşıyır: “Bu gün nevroloqlarla yanaşı digər ixtisasdan olan həkimlər də konfransda iştirak edir. Nevroloqların Milli Assosiyasiyası kadr hazırlığına böyük təkan verir”.
Xatırladaq ki, dekabrın 18-20-də Nevrologiya həftəsi çərçivəsində keçiriləcək konfranslarda Avstriya, Danimarka, Finlandiya, Gürcüstan, Almaniya, İsrail, Qazaxıstan, Rusiya, Tacikistan,Türkiyə, Böyük Britaniya, Ukrayna, Özbəkistan və Qırğız Respublikasından nümayəndələr iştirak edəcəklər. Tədbiri Nevroloqların Milli Assosiasiyası təşkil edib.
