Rusiya “Avanqard” raketini döyüşə hazırladı
Rusiyanın müdafiə naziri Sergey Şoyqu Prezident Vladimir Putini illərdir aparılan sınaqlardan sonra yeni qitələrarası hipersonik silahın istifadəyə hazır olduğuna dair məlumatlandırıb.
Rakus.az xəbər verir ki, Müdafiə Nazirliyinin bildirdiyinə görə, müdafiə naziri prezidentə “Avanqard” adlı hipersonik raket sistemi ilə təchiz olunan ilk raket kompleksinin döyüşdə istifadəyə verildiyini deyib.
Şoyqu daha sonra ordunun yüksək rütbəli üzvləri ilə telefon danışığı zamanı bilditib: “Sizi ordumuz və bütün millətimiz üçün bu əlamətdar hadisə münasibətilə təbrik edirəm”.
Telefon danışığı zamanı Strateji Raket Qüvvələrinin rəisi general-mayor Sergey Karakayev “Avanqard”ın Ural dağlarının cənubunda, Orenburq bölgəsindəki bir hərbi hissədə yerləşdirildiyini bildirib.
Putin “Avanqard” haqqında açıqlamanı 2018-ci ilin mart ayında illik məruzə çıxışı zamanı verib və raketin hədəfə gedərkən kəskin manevrlər etmək qabiliyyətinin reaketdən müdafiə sistemlərini yararsız edəcəyini vurğulayıb.
“O, hədəfə doğru meteorit kimi, ildırım kimi gedir” deyə, o bildirib.
Putin “Avanqard”ın yaranmasını 1957-ci ildə Sovet İttifaqının fəzaya ilk peykinin buraxılması ilə müqayisə edib və bunu texnoloji bir irəliləyiş kimi xarakterizə edib.
