Ruhani ABŞ-a 1988-ci ildə vurulan İran təyyarəsini xatırlatdı
İran prezidenti Həsən Ruhani ABŞ prezidenti Donald Trampın islam respublikasının 52 obyektinə zərbə endirəcəyi barədə təhdidinə cavab olaraq Birləşmiş Ştatlara 1988-ci ildə vurulmuş sərnişin təyyarəsini xatırladıb.
Rakus.az xəbər verir ki, İranın dövlət başçısı bununla bağlı bəyanatı özünün “Twitter”dəki hesabında paylaşıb.
Ruhani qeyd edib ki, onun ölkəsində ABŞ-ın obyektlərinə cəza kimi zərbələr endirmək üçün səbəblər çoxdur. “Kim ki, 52-yə istinad edir, 290 sayın və IR655 reysini xatırlamalıdır. Heç vaxt İran xalqını hədələməyin”, – deyə İran lideri sosial şəbəkədə yazıb.
Prezident 1988-ci ilin iyul ayında ABŞ Hərbi Dəniz Qüvvələrinin raketi ilə Fars körfəzi üzərində vurulan A300 sərnişin təyyarəsi ilə bağlı hadisəni xatırladıb. Təyyarə Tehrandan Dubaya uçurdu. Təyyarədə olan 290 nəfərin hamısı öldürülüb.
Xatırladaq ki, Şənbə günü prezident Donald Trump, ABŞ-ın mədəni irs yerləri daxil olmaqla İranın 52 obyektinə (İran tərəfindən illər əvvəl 52 amerikalını əsir götürüldüyünə görə) hücüm etməyə hazır olduqlarını yazıb.
