Özbəkistan hökuməti istefaya getdi, Tənzilə Narbayeva Senat sədri seçildi - FOTO
Yanvarın 20-də Özbəkistan Ali Məclisi Senatının iclasının sonunda ölkənin Baş Naziri Abdulla Aripov Hökumətin tam tərkibdə istefa verdiyini elan edib.
Rakus.az xəbər verir ki, qanunvericiliyə uyğun olaraq Ali Məclisin və Senatın deputatları tam formalaşdırılandan sonra Hökumət istefa verir.
Ölkə qanunlarına görə, yeni Hökumət formalaşdırılana qədər istefa verən Hökumətin üzvləri öz səlahiyyətlərini icra edirlər.
Yeni Hökumətin yaxın günlərdə formalaşdırılması nəzərdə tutulur.
Bu gün yeni seçilmiş Özbəkistan Ali Məclisi Senatının birinci iclası keçirilib.
Rakus.az xəbər verir ki, iclasda Özbəkistan Prezidenti Şavkat Mirziyoyev çıxış edərək senatorları təbrik edib, onlara uğurlar arzulayıb.
Tənzilə Narbayeva gizli səsvermə ilə yenidən Özbəkistan Ali Məclisi Senatının sədri, Sadıq Safayev sədrin birinci müavini, Musa Erniyazov və Zayniddin Nizamxocayev müavin seçiliblər.
Xatırladırıq ki, yanvarın 16-17-də Senata keçirilən seçkilərdə 84 senator seçilib. Bir gün sonra isə qanunvericiliyə uyğun olaraq Özbəkistan Prezidenti Şavkat Mirziyoyev 16 senator təyin edib. Beləliklə də 100 senatordan ibarət Senat tam formalaşıb.
