Nyu-Roşalda ilk karantin zonası yaradılır
Nyu-York ştatının qubernatoru Endryü Kuomo Nyu-Roşel şəhəri ətrafında 1,5 kilometrlik ilk karantin zonası yaratmaq barədə qərar verib.
Rakus.az xəbər verir ki, qərara əsasən məktəblər, məbədlər, kilsələr və insanların kütləvi şəkildə toplaşdığı digər məkanlar iki həftə müddətinə bağlanacaq.
Qaydalara riayət olunması, ictimai obyektlərin təmizlənməsi və dezinfeksiyası, həmçinin şəhər əhalisinin ərzaqla təmin edilməsinə kömək göstərmək məqsədilə ştatın milli qvardiyası bu işə cəlb olunacaq.
Çərşənbə axşamı gününə olan vəziyyətə görə, Vestçester dairəsində yerləşən Nyu-Roşel şəhərində 174 nəfərdə koronavirus xəstəliyi aşkarlanıb. Hakimiyyət dairələrinin verdiyi məlumata əsasən, yoluxanların 100-dən çoxu ortodoksal yəhudi icmasının üzvləridir. Mənbə koronavirusa yoluxmuş hansısa vəkilin onu icmada bir neçə gündə yaydığını bildirir. Bu cəhətdən Nyu-Roşel yalnız ABŞ-da son günlər çoxsaylı yoluxma və ölüm halları qeydə alınmış Vaşinqtondan geridə qalır.
Kuomo Nyu-Roşeldə karantin zonası yaradıldığını elan edərək hamını sakitliyə riayət etməyə çağırıb və bildirib ki, “bu həqiqətən də həyat və ölüm məsələsidir”. Qubernatorun sözlərinə görə, insanların sıx toplaşdığı istənilən yer, o cümlədən bir neçə məktəb martın 25-dək bağlı qalacaq.
Birləşmiş Millətlər Təşkilatı virusun yayılmasının qarşısını almaq məqsədilə Nyu-Yorkdakı mənzil-qərargahının qapılarını ictimaiyyət və turistlər üçün bağlayıb və ekskursiyaları dayandırıb.
