Bəhram və Tahir yeri bəyənmədilər
Xəbər verdiyimiz kimi, bu il martın 1-də Prezident İlham Əliyev və birinci xanım Mehriban Əliyeva nın mədəniyyət, incəsənət, ədəbiyyat xadimləri ilə görüşündə əməkdar artistlər Bəhram Bağırzadə və Tahir İmanov bəzi təkliflərlə çıxış edmişdilər.
B.Bağırzadə ölkə rəhbərindən Bakıda Hacı Zeynalabdin Tağıyevin heykəlinin ucaldılmasını xahiş etmişdi. T.İmanov isə babası Süleyman Ələsgərovun adının əbədiləşdirilməsi üçün onun adına küçə verilməsini istəmişdi. Ölkə başçısı hər iki təkliflə bağlı Bakı Şəhər İcra Hakimiyyətinə müvafiq göstərişlər vermişdi.
Rakus.az xəbər verir ki, meriya hər iki təkliflə bağlı Bakının müxtəlif yerlərinə baxış keçirib və müvafiq küçələr seçib.
Lakin təklif edilən yerlər Bəhram Bağırzadə və Tahir İmanov tərəfindən bəyənilməyib.
Mənbə qeyd edir ki, hər iki əməkdar artist özlərinin təklif etdiyi yerlərə baxış keçirilməsində israr edir.
Xatırladaq ki, B.Bağırzadə heykəlin “Kukla” teatrı ilə üzbəüz ərazidə ucaldılmasını istəyir. Həmin yer isə müxtəlif illərdə Məhəmməd Əmin Rəsulzadənin heykəlinin ucaldılması üçün müzakirə predmeti olub.
T.İmanov isə şəhərin mərkəzi küçələrindən birinə babasının adının verilməsində israrlıdır. (Modern.az)
