Rövşən Rzayev şəhid ailəsini qəbul etdi
Vətənimizin bütövlüyü uğrunda gedən döyüşlərdə – 1994-cü ildə qəhrəmancasına şəhid olan Əbülfət Almirzəyevin həyat yoldaşı Xavər Almirzəyevanın və qızının qandonduran yaşayış şəraiti barədə yazımızda Qaçqınların və Məcburi Köçkünlərin İşləri üzrə Dövlət Komitəsinin biganəliyi ciddi tənqid olunmuşdu.
( https://rakus.az/qacqickom-sehid-ailesine-biganedir/ )
Bildirmişdik ki, özü kimi məcburi köçkün olan qohumlarının heç bir şəraiti olmayan komalarına sığınan şəhid ailəsinin saysız-hesabsız müraciətlərinə komitə tərəfindən bu günə qədər heç bir reaksiya verilməyib. Yazı dərc olunandan sonra komitə əməkdaşları bizimlə əlaqə saxlayaraq məsələnin araşdırılacağını bildirdilər. Sonra Zəngilan Rayon İcra Hakimiyyəti başçısının müavini Nizami Mönsümov şəhid ailəsinin yaşayış şəraiti ilə yerində tanış olmaq üçün bizimlə birlikdə onların məskunlaşdığı yerə getdi.
Dünən isə Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayev şəhid ailəsini şəxsən qəbul edərək vəziyyəti ilə maraqlandı. Sədrin tapşırığına əsasən şəhid ailəsinin müraciəti müvafiq komisiyaya tapşırıldı.
PS: Məsələnin həllini nəzarətdə saxlayacağıq.
