Xələf Xələfov brifinq keçirdi, erməni təxribatını lənətlədi
“Bilirsiniz ki, bu qarşdurmalarda Azərbaycan tərəfindən vətənpərvər insanlar iştirak edir və bunlar dinc yolla Ermənistanın işğalçı siyasətinə qarşı etirazlarını bildirirlər. Ermənilər tərəfdən isə radikal erməni qruplaşmaları, heç bir hücum faktlarından, heç bir riyakarlıqdan çəkinməyərək Azərbaycana aid olan missiyalara, binalara Azərbaycan etnik mənsubiyətinə görə hücum etməklə məşğul olurlar”.
Rakus.az xəbər verir ki, bu fikirləri Azərbaycan Xarici İşlər nazirinin müavini Xələf Xələfov bu gün keçirilən brifinqdə deyib.
O bildirib: “Mən erməni hakim rejiminə bildirmək istəyirəm ki, onların bu avantürası da boşa çıxacaq və boşa çıxmışdır da. Çünki dünyanın sivil ölkələri – harda bunlar sığınacaq tapıb yaşayırlar – heç vaxt imkan verməzlər ki, onların ölkələrində qanunun aliliyi, beynəlxalq hüquqa hörmət, irqi ayrı-seçkilik zəminində təxribatlar törədilsin. Bu təxribatlar törədilirsə, bunların qarşısı qətiyyətlə alınacaq.
İndiki Ermənistan rejimi hərb meydanında iflas olduqdan, sülh prosesində bankrot olduqdan sonra artıq Azərbaycana qarşı hücumları, təcavüzkarlıq siyasətini və azərbaycanlılara qarşı hücumları daha çox erməni icması yaşayan ayrı-ayrı ölkələrin mərkəzi şəhərlərinə, küçələrinə keçirib”.
X.Xələfov söyləyib ki, bu, Vaşinqtonda, Los-Ancelesdə, Varşavada, Brüsseldə, Parisdə Torontoda, Stokholmda və digər ölkələrin paytaxt və böyük şəhərlərində baş verməkdədir: “Mahiyyət ondan ibarətdir ki, Ermənistanın hakim rejiminin Azərbaycana qarşı təcavüzün genişləndirilməsi istiqamətində atdığı addımlar iflasa uğradıqdan və danışıqlar prosesində bankrot siyasət sahibi olmasından sonra dünya ictimaiyyətinin bu problemin həll olunmasındakı diqqətini yayındırmaq üçün bu cür iyrənc və məkrli addımlar atmağa başlayıb. Mən artıq ABŞ-ın Azərbaycandakı səfiri ilə də görüşmüşəm. Aldığımız məlumata görə, Los-Ancelesdə 3 min nəfərə yaxın erməni icmasının nümayəndələri sayca az olan Azərbaycan nümayəndələrinə hücum edib və onlara təzyiq göstərərək xəsarət yetirib, rəmzlərimizə qarşı vandalizm hərəkətləri törədiblər, nalayiq hərəkətlər ediblər”.
Nazir müavini təəssüf hissi ilə deyib ki, bütün baş verənlər polisin gözləri qarşısında baş verib: “Onlar vətəndaşlarımızın, icma nümayəndələrinin toxunulmazlığını qoruya bilməyib. ABŞ səfiri də bunu etiraf edib. Araşdırmalar başlayıb və səbəbkarlar məsuliyyətə cəlb olunacaq, məsələyə hüquqi qiymət veriləcək. Bu kimi görüşlər digər ölkələrin səfirləri ilə də keçirilir.
Azərbaycan dövləti hər bir vətəndaşın yanındadır və onların müdafiəsi üçün lazımi bütün addımları atır. Heç vaxt imkan verə bilmərik ki, Ermənistan xaricdə fəaliyyət göstərən missiyamıza təzyiq göstərsin. Bu təhdidlərin hamısının qarşısı qətiyyətlə alınacaq. Necə ki, bu gün Azərbaycan Ordusu işğal edilən torpaqlarımızı geri qaytarmağa qadirdir, eləcə də dövlətimiz də soydaşlarımzı qorumaqda, onlara dəstək olmağa hər zaman hazırdır və buna imkanları çatır”.
