“Ermənistanda faşizmə xüsusi məhəbbət var”.- XİN rəsmisi
“Tovuz rayonunda baş verən erməni təxribatı zamanı Serbiya silahlarından istifadə olunması ilə bağlı müvafiq danışıqlar aparılıb. Serbiya dövləti bu məsələ ilə bağlı rəsmi araşdırmalara başlayıb və biz yekun izahat gözləyirik”.
Rakus.az xəbər verir ki, bunu iyulun 23-də Xarici İşlər Nazirliyində keçirilən brifinqdə Xarici İşlər nazirinin müavini Xələf Xələfov deyib..
O bildirib ki, Serbiya tərəfi bu məsələnin ciddiyyətini anlayır: “Beynəlxalq hüquqda silah məsələsi ilə bağlı istehsalçı ölkə heç zaman məsuliyyətdaşıma mövqeyindən azad edilmir. Ermənistanda faşizmə xüsusi məhəbbət var. Onların həyata keçirdiyi siyasətdə faşizmin bütün elementlərinə rast gəlinir. Lakin, dünya artıq həqiqəti başa düşür və qəbul edir. “Mən Serbiyanın müvəqqəti işlər vəkilini dəvət edəndə çox açıq surətdə dedim ki, bizdə tam müfəssəl, tam dəqiq məlumatlar var ki, bu, baş verib. İndi söz Serbiya tərəfindədir. Bunu araşdırmalıdır və bizə izahat verməlidir. Baş verməsi və nəticələri barəsində. Təbii ki, biz səfirliyimiz vasitəsilə təmasları davam etdiririk. Səfirimiz orada müəyyən görüşlər keçirib, artıq bizə müəyyən cavablar veriblər. Hazırda Serbiya tərəfində bu məsələnin rəsmi araşdırılması prosesi gedir. Biz gözləyirik ki, yaxın zamanda dövlət tərəfindən aparılan bu araşdırma başa çatacaq. Azərbaycan tərəfinə adekvat olan bir izahat verəcəkdir. Biz Serbiya tərəfindən həm izahat, həm də bu addımların atılmasına gətirib çıxaran səbəblərin aradan qaldırılmasını tələb etmişik”.
Onun sözlərinə görə, ABŞ-ın Azərbaycandakı səfiri Los-Ancelesdə baş verənlərə görə təəssüfləndiyini bildirib. O, mənə baş verən faktlara bəraət qazanadırıla bilmədiyini dedi. Təbii ki, ermənilərin radikal hərəkətləri ictimai qiymətini alıb. Artıq Los-Anceles polisi məsələ ilə əlaqədar bəyənatla da çıxış edib”.
Nazir müavini bildirib ki, Azərbaycanın Los-Ancelesdəki Baş Konsulluğu və Vaşinqtondakı səfirliyinin mühafizəsinin təmin edilməsi məsələsi geniş müzakirə edilib: “Müzakirədən sonra nəinki həmin bölgələrdə, eləcə də digər paytaxtlarda bu məsələyə yenidən baxılacaq. Dost ölkələrdən xahiş etmişik ki, diplomatik missiyamızın təhlükəsizliyinin təmin olunması və mühafizəsinin gücləndirilməsi üçün əlavə addımlar atılsın. Çünki hər bir ölkə ilə normal münasibətimiz var. Beynəlxalq əlaqələr sistemində yaradılan əməkdaşlıqda qarşılıqlı əlaqələr dayanır. Bu məsələdə ikili standartlardan söhbət gedə bilməz. Bütün dövlətlər üçün Vyana öhdəlikləri tam məcburidir. Belə öhdəliklər qarşılıqlı prioritet xarakter daşıyır”.
Xarici İşlər nazirinin müavini deyib: “Ermənistan hakim rejimi bilməlidir ki, Azərbaycan dövlətinin qüdrəti onun millətinin, xalqının iradəsindən, birliyindən qaynaqlanır. Onu da bilsinlər ki, Azərbaycan dövləti hər yerdə öz vətənpərvər soydaşlarının yanındadır və yanında olacaq”.“Ermənistanın atdığı son addımları – xarici ölkələrdə bizə qarşı təşkil etdikləri hücumlar artıq nəticə vermir. Ona görə ki, Azərbaycan bu gün beynəlxalq münasibətlərə inteqrasiya olunmuş, beynəlxalq münasibətlərin çox nüfuzlu faktorlarından birinə çevrilmiş bir ölkədir. Azərbaycan ayrı-ayrılıqda hər bir ölkə ilə özünün beynəlxalq münasibətlər sistemini, ikitərəfli münasibətlər sistemini qurub. Bu sistemdə qarşılıqlı hörmət və qarşılıqlı öhdəliklər var. İnanıram ki, heç kim ermənilərin riyakarlığına, qəddarlığına, qaragüruhçuluğuna imkan verməyəcəklər”.
