Koronavirusa rekord sayda yoluxma qeydə alındı
- Son sutka ərzində dünyada koronavirusa rekord sayda – 289 min 28 yoluxma halı qeydə alınıb. Öncəki gün yoluxanların sayı 276 min 433 nəfər təşkil etmişdi.
Rakus.az xəbər verir ki, həmçinin iyulun 24-də COVID-19 infeksiyası səbəbindən 6 min 199 nəfər həyatını itirib.
Saytın Bakı vaxtı ilə bu gün saat 14:10-a olan məlumatına əsasən, dünyada koronavirusa yoluxanların sayı 15 milyon 964 min 723 nəfərə, infeksiya səbəbindən ölənlərin sayı isə 643 min 171 nəfərə çatıb. Eyni zamanda, 9 milyon 759 min 618 nəfər koronavirus xəstəsi sağalıb, müalicəsi davam edən 5 milyon 561 min 934 xəstədən 66 min 259-nun vəziyyəti ağır qiymətləndirilir.
Ötən sutka ərzində ən çox yoluxma halı ABŞ-da qeydə alınıb – 78 min nəfər. Bu, həm də ölkə daxilində qeydə alınan ən yüksək göstəricidir. Beləliklə Birləşmiş Ştatlarda COVID-19 infeksiyasına yoluxanların sayı 4 milyon 248 min 492 nəfərə çatıb. Bu göstəriciyə görə sonrakı yeri tutan Braziliyada yoluxanların sayı 2 milyon 348 min 200 nəfərdir. Hindistanda 1 milyon 337 min 22, Rusiyada 800 min 849, Cənubi Afrika Respublikasında 421 min 996, Peruda 375 min 961 nəfər virusa yoluxub.
ABŞ COVID-19 xəstəliyindən ölənlərin sayına görə də dünya lideridir – 148 min 490 nəfər. İlk beşliyə daxil olan Braziliyada 85 min 385, Birləşmiş Krallıqda 45 min 677, Meksikada 41 min 908, İtaliyada isə 35 min 97 nəfər koronavirus səbəbindən həyatını itirib.
Artıq xeyli müddətdir ki, COVID-19 infeksiyasından sağalanlara nisbətdə ölənlərin sayında mütəmadi azalma müşahidə edilir. Hazırda bu göstərici 6,2 faizdir.
