Bakıda “Muğam” Televiziya Müsabiqəsinə start verilib - FOTO - VİDEO
Bakıda IX “Muğam” Televiziya Müsabiqəsinə start verilib.
Rakus.az xəbər verir ki, mayın 13-də Heydər Əliyev Fondunun, “Azərbaycan Televiziya və Radio Verilişləri” QSC və Mədəniyyət Nazirliyinin birgə dəstəyi ilə təşkil olunan IX “Muğam” Televiziya Müsabiqəsinin ilk efiri yayımlanıb. Müsabiqədə yaşı 8-dən 30-a qədər olan yeniyetmə və gənclər iştirak edir. Builki müsabiqədə iki yaş aralığında: 8-16 yaşında yeniyetmələr və 16-30 yaşında gənclər yarışırlar. Müsabiqədə təxminən 3 ay ərzində Bakıda və bölgələrdə keçirilən dinləmələr əsasında seçilmiş ifaçılar qatılıb. Müsabiqənin final konserti və qaliblərin mükafatlandırılması avqust ayında olacaq. Şəhid Xudayar Yusifzadənin xatirəsinə “Xudayar təsnifi” adlandırılan “Vətən yaxşıdır” mahnısı ilə açılışı edilən müsabiqədə 20 gənc və 10 uşaq iştirak edir.
Yarışmanın münsiflər heyətində Xalq artistləri Arif Babayev, Səkinə İsmayılova, Mələkxanım Əyyubova, Sərdar Fərəcov, Mənsum İbrahimov, Nəzakət Teymurova, Vamiq Məmmədəliyev və Əməkdar mədəniyyət işçisi İlqar Fəhmi yer alıb.
Müsabiqə hər həftənin II və IV günləri AzTV və Mədəniyyət TV-də canlı yayımlanacaq.
