BNA susur, avtobuslar qaydanı pozur - FOTO - VİDEO
Bakıda avtobus sürücülərinin qayda pozuntuları nəticəsində tıxacların yaranması barədə dərc edilən silsilə yazılara Bakı Nəqliyyat Agentliyinin də rəsmi cavab məktubunu almışıq, münasibətini də öyrənmişik. Bu günə qədər isə ciddi heç bir tədbir görülməyib. Bu səbəbdən verilən vədlər, deyilən fikirlər söz yığnığını xatırladır. Hətta aylarla davam edən bu özbaşınalıqlar yay mövsümü ilə əlaqədar olaraq daha da kəskinləşib. Çünki söhbət paytaxtla dənizkənarı qəsəbələri və çimərlikləri birləşdirən yoldan – Zabrat qəsəbəsindəki piyada keçidinin altında qeyri-qanuni yaradılan avtobus dayanacağından gedir. Əvvəlki yazımızda ətraflı məlumatla burada tanış olmaq mümkündür.
Səhər və axşamlar burada yaranan tıxaclar saatlarla davam edir. Ona görə ki, sürücülər avtobusu onlar üçün nəzərdə tutulan dayanacaqlarda deyil, düz yerüstü piyada keçidinin altında saxlamaqla tıxacların yaranmasına səbəb olurlar. Dəfələrlə yazılmağına və deyilməyinə, BNA-nin tədbirlər görəcəyi ilə bağlı verdiyi vədlərə baxmayaraq hələ də sürücülər özbaşılanıq edərək, qayda-qanunlara məhəl qoymurlar. Özü də bu qanunsuzluqlar Dövlət Yol Polisi əməkdaşlarının gözləri qarşısında baş verir. Bununla əlaqədar paytaxt sakinlərinin fikirlərini də dərc etdik.
Bu gün bir daha qeyd olunan məkənda olarkən heç bir tədbirin görülmədiyinin şahidi olduq. Çəkiliş qrupumuzun təqdim etdiyi foto və video görüntülər buna əyani sübutdur.
Əgər belədirsə, onda Bakı Nəqliyyat Agentliyinin hansı faydasından danışmaq olar ?!
Görəsən bu özbaşılanıqlar çoxmu çəkəcək ?!
