Bubon taunu ABŞ-a yayılır
ABŞ-da Kolorado ştatının sakini bubon taununa yoluxub.
Rakus.az xəbər verir ki, həkimlər narahat olmaq üçün ciddi səbəblərin olmadığına əmindirlər. Qeyd olunur ki, bu, 2015-ci ildən bəri ilk belə hadisədir. Amerikalının dələdən yoluxduğu ehtimal olunur.
Xəstənin vəziyyətinin artıq sağalmağa doğru getdiyi bildirilir.
Xatırladaq ki, iyunun əvvəlində Monqolustanda bubon taununa yoluxma qeydə alınmışdı. Xəstəliyin yayılmasına səbəb monqolların ənənəvi tarbaqan yeməsi göstərilir (Tarbaqan – marmot və ya monqol marmotu (lat. Marmota sibirica) — gəmiricilər dəstəsinin sincablar fəsiləsinə aid məməli heyvan növü. Uzunluğu 60 santimetrə çatır. Vəba daşıyıcıları hesab edilirlər).
Monqol marmotunun ətini yeməyib, sadəcə, kəsməklə belə xəstəliyə yoluxmaq mümkündür.
Vəba ilk növbədə vəhşi gəmiricilərə təsir edən bakterial xəstəlikdir. Bir heyvandan digərinə birə dişləməsi vasitəsilə yayılır. Yoluxmuş birə tərəfindən dişlənən insanlar da vəbaya tutulur.
Ümumdünya Səhiyyə Təşkilatının məlumatına görə, müalicə vaxtında başlamazsa, 24 saatdan az müddətdə xəstəlik yetkin insanı öldürə bilər.
