Cənubi Koreya ilə 94 ölkə əlaqəni kəsdi
Cənubi Koreyada sürətlə yayılan yeni tip koronavirusa (COVID-19) görə bu ölkə vətəndaşlarının girişinə məhdudiyyət və qadağalar tətbiq edən dövlətlərin sayı 94-ə çatıb.
Rakus.az xəbər verir ki, bu barədə Cənubi Koreyanın Xarici İşlər Nazirliyi məlumat yayıb.
Məlumatda bildirilir ki, 33 dövlət və ərazi vahidi koreyalıların və son 2 həftə ərzində Cənubi Koreyada olmuş əcnəbilərin ölkəyə girişinə qadağa qoyub. Maldiv, Vyetnam, Yaponiya, Fici, Filippin və bir neçə başqa dövlət Cənubi Koreyada koronavirusun ən çox yayıldığı Dequ şəhərinə və Şimali Qyonqsanq vilayətinə səfər edənlərin ölkəyə girişinə qadağa tətbiq edirlər.
Virusun ortaya çıxdığı və ən çox yayıldığı Çinin 15 vilayəti də daxil olmaqla, 22 ölkə Cənubi Koreyadan gələnlərin 14 gün məcburi karantində qalmasını tələb edir. Bəzi ölkələr isə Cənubi Koreya vətəndaşları üçün sadələşdirilmiş viza rejimini müvəqqəti dayandırıb. ABŞ, Fransa, Niderland və Avstriya daxil olmaqla 22 ölkə öz vətəndaşlarına Cənubi Koreyaya səyahəti planlaşdırarkən riskləri nəzərə almaq barədə xəbərdarlıq edib.
Cənubi Koreyanın Xarici İşlər naziri xanım Kan Kyun-hva parlamentdə deputatların məsələ ilə bağlı sualını cavablandırarkən deyib ki, müxtəlif dövlətlərin koreyalılara tətbiq etdiyi qadağa və məhdudiyyətlər ölkənin imicinin korlanması demək deyil. Bu, sırf virusun yayılma ehtimalı ilə əlaqədardır. O, işgüzar və yaxın qohumlarına baş çəkmək məqsədləri ilə xaricə səyahət etmək istəyənlərə istisnaların tətbiq olunması üçün müvafiq ölkələrin səlahiyyətli qurumları ilə danışıqlar aparıldığını deyib.
Qeyd edək ki, son məlumata əsasən, Cənubi Koreyada koronavirusa yoluxanların sayı 5621 nəfərə çatıb. Ölənlərin sayı isə 34-dür. Cənubi Koreya virusa yoluxanların sayına görə Çindən sonra ikincidir.
