COVID-19-u müalicə edən dərmanın istehsalı başlayır
Rusiyanın “R-Farm” şirkəti yüngül və orta dərəcəli COVID-19 xəstəliyinin terapiyasında istifadə olunacaq “Koronavir” preparatının qeydiyyatını başa çatdırıb.
Rakus.az xəbər verir ki, preparatın istehsalı Sənaye İnkişaf Fondunun dəstəyi ilə “R-Farm” şirkətinin Yaroslavl şəhərindəki müəssisəsində həyata keçiriləcək.
“Koronavir” Rusiyada və dünyada SARS-CoV-2-nin fəsadları ilə deyil, birbaşa virusun özü ilə mübarizə aparan ilk dərman vasitəsi hesab olunur.
Dərmanın yüksək effektivliyi yüngül və orta dərəcəli COVID-19 xəstələri üzərində aparılan klinik tədqiqatlar zamanı öz təsdiqini tapıb.
“R-Farm”ın məlumatına görə, tədqiqatlar “Koronavir”in infeksiyanın müalicəsi üçün ən yaxşı preparat olduğunu sübuta yetirib.
Preparat qeydiyyat şəhadətnaməsini aldıqdan dərhal sonra Moskva, Sankt-Peterburq, Yaroslavl və digər bölgələrin qabaqcıl xəstəxanalarında istifadə ediləcək.
