Danışıqlarda konsensus əldə olundu
Şimali Afrikanın üç ölkəsi – Misir, Efiopiya və Sudan arasında uzun müddətdir mübahisə obyekti olan “Böyük Efiopiya Dirçəliş Bəndi” üzrə konsensus əldə olunub. Bu barədə Afrika İttifaqının (Aİ) bəyanatında bildirilib.
Rakus.az xəbər verir ki, bəyanatı şərh edən Misir Xarici Əlaqələr Şurasının üzvü, Qahirə Universitetinin professoru Nurhan əl-Şeyx AZƏRTAC-a bildirib ki, rəsmi Qahirə problemin həllinə müdaxilə etməsi üçün BMT Təhlükəsizlik Şurasına müraciət ünvanlayıb, lakin məsələ Cənubi Afrika Respublikasının Prezidenti, Aİ-nin sədri Siril Ramafozanın təşəbbüsü ilə keçirilən virtual sammitdə tərəflərin özləri arasında müvəqqəti həllini tapıb. O əlavə edib ki, Efiopiya yekun saziş imzalananadək Nil çayının suyunu bəndə doldurmayacağı barədə öhdəlik götürüb. Politoloq xatırladıb ki, Misir Prezidenti Əbdülfəttah əl-Sisi iki gün əvvəl sözügedən məsələnin öz ölkəsinin su təchizatı baxımından həyati əhəmiyyətə malik olduğunu vurğulayıb. “Belə ki, Nil çayının suyundan səmərəli istifadəyə dair ədalətli razılaşma Şimali Afrikanın hər üç ölkəsinin maraqlarına uyğundur. Yeni növ koronavirus pandemiyası dövründə bəndin su ilə doldurulması nəticəsində yarana biləcək quraqlıq regionda humanitar fəlakətə, ərzaq qıtlığına gətirib çıxara bilər”, –deyə politoloq bildirib.
Afrika İttifaqının bəyanatında qeyd olunub ki, Misir, Sudan və Efiopiya liderləri Əbdülfəttah əl-Sisi, Abdalla Hamdok və Abiy Əhməd hökumət nümayəndələri və ekspertlərdən ibarət komissiya yaradılması, mübahisəli məsələnin həllinə dair yekun saziş hazırlanması barədə razılığa gəliblər. Keçirilən virtual Afrika sammitində çıxış edən Misir Prezidenti vurğulayıb ki, rəsmi Qahirə BMT Təhlükəsizlik Şurasının bu gün keçiriləcək iclasında konsensusun əhəmiyyətini qeyd edəcək və gələcək addımlar barədə məlumat verəcək. O, Əddis-Əbəbənin də Nil çayı bəndi vasitəsilə elektrik enerjisi hasil etməsi hüququnu tanıdığını, lakin bu problemin Sudan və Misirin də maraqları çərçivəsində həll edilməli olduğunu əlavə edib.
