Davos İqtisadi Forumu təxirə düşdü
Hər il yanvar ayında İsveçrənin Davos qəsəbəsində keçirilən Dünya İqtisadi Forumu növbəti il təxirə salınacaq.
Rakus.az xəbər verir ki, buna səbəb bütün dünyada tüğyan edən yeni növ koronavirus – COVID-19 pandemiyasıdır.
Forumun sözçüsü Adrian Monk bununla bağlı yazılı açıqlama yayımlayıb.
Açıqlamada bildirilib: “Bu qərarı vermək asan olmadı, çünki qlobal liderlərin ortaq bərpa planını hazırlamağa və pandemiyadan sonrakı dövrlə bağlı müzakirələr üçün bir araya gəlməsi çox aktualdır. Bununla belə, mütəxəssislərin tövsiyəsi budur ki, yanvar ayında biz bunu təhlükəsiz şəkildə edə bilməyəcəyik”.
Monk tədbirin nə vaxt keçirilməsi ilə bağlı dəqiq tarix verməsə də, növbəti il yayın əvvəllərində keçiriləcəyini qeyd edib.
Xatırladaq ki, 1971-ci ildən bəri hər il istisnasız olaraq yanvar ayında baş tutan Davos Dünya İqtisadi Forumunda 120 ölkədən üç mindən çox dövlət rəsmisi, siyasətçi, biznesmen və QHT təmsilçiləri və akademiklər iştirak edir.
