“Dövlət başçısının çağırışına məsuliyyətlə yanaşaq” – HƏKİM
“Gidromaşservis” şirkətində çalışan təqaüd yaşlı əməkdaşlar adından Hüseyn Hüseynov vətəndaşlara müraciət edib.
Müraciətinə qədim Roma filosofu Senekanın “Ən sadə nümunə ən alovlu nitqdən daha çox inandırır” müdrik kəlamı ilə başlayan həkim deyir:
“Mən də həkim və təqaüdçü kimi dünyanı və ölkəmizi gərginlikdə saxlayan bu təlatümlü günlərdə vətəndaşlarımıza, Respublika ictimaiyyətinə, özəl şirkət rəhbərlərinə müraciət edirəm.
İllər öncə təqaüdə çıxsam da razılıq əsasında “Gidromaşservis” şirkətində məsləhətçi kimi çalışıram. Bir ənənə olaraq şirkətdə idarəçilikdə, istehsalatda böyük təcrübəsi olan, bu gün də illər boyu qazandıqları bilik və bacarıqlarını tətbiq edən 20 nəfərə qədər təqaüd yaşlı əməkdaş çalışır.
Koronavirus pandemiyası ilə bağlı ölkə Prezidentinin müraciətindən dərhal sonra şirkət rəhbərliyi bu kontingentə fərdi qaydada müraciət etdi və işə çıxmamağı xahiş etdi. Xidmət haqqlarının tam ödəniləcəyi diqqətimizə çatdırıldı. Belə yanaşmanın mənəvi dəstəyindən daha çox, situasiya anında doğru qərar verilməsi faktı olmasını qeyd etmək istəyirəm. Lakin evdə oturmaqla da telefon rejimində təcrübəmiz tələb olunan məqamlarda muzakirələrdə iştirak edir, səmərəli təkliflərimizi əsirgəmirik.
Bu narahat günlərdə şirkət, müəssisə rəhbərlərinə müraciət edirəm. Dövlət başçımızın çağırışına məsuliyyətlə yanaşaq. Mümkün qədər az təmas tələb edən iş şəraiti yaradılmasında töhfənizi əsirgəməyin. Bu bəlaya tezliklə qalib gələ bilməyimiz sizin, bizim, hamımızın məsuliyyətli yanaşmamızdan asılıdır”.
