Ermənilərə növbəti zərbə – daha dörd xartiya ləğv edildi - VİDEO
Fransanın Qrenobl şəhərinin inzibati məhkəməsi Fransanın şəhər, əyalət və birlikləri ilə qondarma Dağlıq Qarabağ rejimi arasında imzalanan daha 4 dostluq xartiyasını ləğv edib. Bu barədə Fransada fəaliyyət göstərən erməni diasporunun əsas media vasitələrindən biri olan “Nouvelle d,armenie” saytı xəbər verir.
Rakus.az xəbər verir ki, Məhkəmənin qərarı ilə Drom, Valans, Bur le Valans və Bur de Peaq departamentlərinin Dağlıq Qarabağadakı 4 bələdiyyə ilə imzaladığı “Dostluq Xartiya”ları qanunsuz sayılaraq ləğv olunub. Qrenobl Məhkəməsinin qərarına görə, sözügedən departamentlərin 26 ildir işğal altında olan Azərbaycan əraziləri ilə belə sənədlər imzalamaq hüquqları yoxdur: “Eyni zamanda, həmin sənədlər Fransanın xarici siyasət kursu və prinsipləri ilə kəskin ziddiyyət təşkil edir. Sənədlər Fransanın yürütdüyü siyasətin əsas, təməl prinsiplərini nəzərə almır”.
Xatırladaq ki, bundan öncə mayın 29-da Sersi-Pontuaz İnzibati Məhkəməsi bu ölkənin Arnuvil şəhəri və 1992-ci ildən bəri Ermənistan silahlı qüvvələri tərəfindən işğal altında olan Xocavənd rayonu arasında imzalanmış dostluq xartiyasını qeyri-qanuni elan edərək onu ləğv edib. (ATV.az)
