“Uno” ən çox baxış sayı toplayan mahnıdır
“Eurovision 2020” mahnı müsabiqəsi üçün Rusiya təmsilçisi “Little Big” qrupunun hazırladığı “Uno” mahnısı müsabiqənin “YouTube” kanalında ən çox baxış sayı toplayan klip olub.
Rakus.az xəbər verir ki, bu barədə müsabiqənin təşkilatçıları məlumat verib.
Müsabiqənin “Twitter” səhifəsində bildirilib: “Biz “Little Big” qrupunu təbrik edirik. Qrupun “Uno” mahnısına çəkilmiş klipi Eurovision tarixində ilk dəfə 134 milyon baxış sayı toplayıb”.
Xatırladaq ki, əvvəlki rekord İsrail müğənnisi Nette Barzilaya məxsus olub. O, “Eurovision 2018”də “Toy” (Oyuncaq) mahnısı ilə 133 milyon baxış sayı qazanmışdır.
“Eurovision 2020” mahnı müsabiqəsi koronavirus pandemiyasının yayılması səbəbindən təxirə salınıb.
“Eurovision” mahnı müsabiqəsinin mayın 12-dən 16-dək Rotterdamdakı “Ahoy” konsert zalında keçirilməsi planlaşdırılırdı. Azərbaycanı müsabiqədə “Kleopatra” mahnısı ilə Samirə Əfəndi təmsil etməliydi.
