Filippində narkotik vasitə alverçiləri öldürülür
Filippin hökumətinin 2016-cı ildə narkotik vasitə alverçilərinə qarşı elan etdiyi mübarizədə indiyədək təxminən 8700 nəfər öldürülüb.
Rakus.az xəbər verir ki, bu barədə məlumatı BMT-nin İnsan Hüquqları üzrə Ali Komissarlığı yayıb.
Ali Komissar Mişel Başelet İnsan Hüquqları Şurasının iclasında bildirib ki, bu ölkədə narkotik vasitələrlə əlaqəli olmasında şübhəli bilinən hər bir şəxsin polis tərəfindən öldürülməsinə, demək olar ki, tam sərbəstlik verilib. Rəsmi Manila cinayətkarların həbs olunaraq məsuliyyətə cəlb edilməsinə maraq göstərmir. Eyni zamanda, hesab olunur ki, öldürülənlər arasında 122 azyaşlı da var.
Filippin Ədliyyə Nazirliyinin videokonfransa qoşulan rəsmi nümayəndəsi isə bildirib ki, hökumət indiyədək baş vermiş beş min ölüm halı ilə əlaqədar yoxlamaların aparılması barədə göstəriş verib. Hüquq-mühafizə orqanlarının müdaxiləsi olmadan hazırlanan hesabat noyabrda təqdim olunmalıdır.
İşgəncələrə Qarşı Dünya Təşkilatı Cenevrədə toplantılarını keçirən BMT-nin İnsan Hüquqları Şurasını bu məsələ ilə bağlı təhqiqat aparılması üçün beynəlxalq komissiyanın yaradılmasına çağırıb.
