Hakimiyyətin rəmzləri təqdim edildi
Mayın 1-də Yaponiya İmperatorunun səlahiyyətlərini təsdiq edən rəmzlər – dövlət möhürü, İmperator möhürü, həmçinin müqəddəs reqaliya hesab edilən qılınc və qiymətli yaşma daşı ölkənin yeni monarxı Naruhitoya təqdim edilib.
Rakus.az xəbər verir ki, Tokionun mərkəzində yerləşən İmperator asarayının “Şam ağacı zalı”nda keçirilən mərasim ölkənin milli telekanalları ilə birbaşa yayımlanıb. Mərasimdə hakimiyyətin üç qolunun nümayəndələri – Baş nazir Şinzo Abe, nazirlər, parlamentin hər iki palatasının sədrləri, Ali Məhkəmənin hakimləri iştirak ediblər.
İmperatorun ictimaiyyətin daha geniş dairəsi ilə görüşü də nəzərdə tutulur. Görüşdə İmperator Naruhito ilk dəfə xalqa müraciət edəcək.
Qanuna uyğun olaraq, vəliəhd-şahzadə İmperator səlahiyyətlərini mayın 1-nə keçən gecə, aprelin 30-da atası İmperator Akito istirahətə getdikdən sonra əldə edib. Eyni zamanda həmin vaxt Yaponiyada yeni Reiva dövrü başlanıb.
Xatırladaq ki, İmperator Akihito 2016-cı ilin avqustunda xalqa müraciət edərək yaşının çoxluğu ilə əlaqədar taxtdan imtina etmə niyyətini açıqlayıb. Yaponiya qanunvericiliyi monarxdan öz səlahiyyətlərini ömrünün sonunadək icra etməyi tələb edir. Buna baxmayaraq, İmperator Akihto üçün istisna hal olaraq parlament tərəfindən onun taxtı tərk etməsinə icazə verən xüsusi qanun qəbul edilib. Taxtdan imtina etdikdən sonra Akihito “Fəxri İmperator” adını alıb və bundan sonra o, dövlət tədbirlərində iştirak etməyəcək. Buna görə də o, bu gün sarayda keçirilən mərasimdə iştirak etmir.
İmperator Naruhito isə, İkinci Dünya müharibəsində məğlub olan Yaponiyada anadan olan ilk monarxdı. O, Tokio elit Qakusuin universitetində və Oksfordda təhsil alıb.
Yeni İmperatorun həyat yoldaşı Masako isə, tanınmış yapon diplomatının qızıdır və o, Tokio Universitetində və Harvardda təhsil alıb. Ailə quranadək Yaponiya Xarici İşlər nazirliyində çalışıb.
İmperator cütlüyünün yeganə övladı şahzadə Ayko 2001-ci il dekabrın 1-də dünyaya gəlib.
