Hindistan Prezidentinin təyyarəsi gecikdi, araşdırma başladı
Hindistanın milli aviadaşıyıcısı olan “Air India” şirkəti haqqında geniş araşdırma başlanılıb.
Rakus.az xəbər verir ki, buna səbəb sentyabrın 15-də Hindistan Prezidentini İsveçrənin Sürix şəhərindən Sloveniyaya aparmalı olan təyyarənin texniki nasazlıq səbəbindən uça bilməməsi və nəticədə dövlət başçısının 3 saat gecikməsidir.
ANİ agentliyi yazır ki, uçuşa az qalmış “Boeing 747” tipli təyyarənin sükan sistemində texniki problem ortaya çıxıb. Uçuş üçün aeroporta doğru yola çıxan Prezident Ram Nat Kovindin korteci texniki nasazlıq barədə xəbəri alandan sonra geriyə – otelə qayıdıb. Mühəndislər problemi aradan qaldırmaqla məşğul olduğu vaxtda “Air İndia” rəhbərliyi Londonda olan “Boeing 777” tipli təyyarəsini Sürixə uçaraq dövlət başçısını Sloveniyaya aparmaq üçün startda saxlayıb. Amma mühəndislər nasazlığı aradan qaldıra biliblər və dövlət başçısı həmin təyyarədə Sloveniyaya uçub.
Xatırladaq ki, Hindistan Prezidenti Ram Nat Kovindin sentyabrın 9-dan İslandiya, İsveçrə və Sloveniyaya rəsmi turnesi başlayıb.
