ISESCO qısametrajlı film mükafatı elan etdi
İslam Dünyası Təhsil, Elm və Mədəniyyət Təşkilatı (ISESCO) “ISESCO rəqəmsal ev” təşəbbüsünün “Distant mədəniyyət” layihəsi çərçivəsində qısametrajlı film mükafatını elan edib.
Rakus.az xəbər verir ki, Azərbaycan Respublikasının ISESCO üzrə Milli Komissiyasının məlumatına görə, mükafat ən yaxşı 3 qısametrajlı filmə müvafiq olaraq 8, 6 və 4 min ABŞ dolları məbləğində veriləcək.
ISESCO bu mükafatın gəncləri bədii yaradıcılığa həvəsləndirmək, onların bədii və sənədli filmlər istehsal etmək istedadlarını üzə çıxarmaq və sülh mədəniyyətini yaymaq məqsədi daşıdığını bəyan edib. Bu mükafat, həmçinin film istehsalını təşviq etmək, ISESCO-nun Qısametrajlı Filmlər Fondunu qurmaq, “həyat iqtisadiyyatı” və gələcək iş formaları, yaradıcılıq, istehsalat və iş yerlərinə dair gələcək təxminləri formalaşdırmağa kömək etmək məqsədlərinə də xidmət edir.
Müsabiqədə iştirak edən filmlər dram, sənədli, irs və folklor, bəşəri dəyərlər, sağlamlıq və ətraf mühit, uşaq filmləri, koronavirus (COVID-19) dövründəki gündəlik həyat və komediya kateqoriyalarını əhatə etməlidir.
Filmdə səsli danışıq olmadan təbii səslər və ya musiqi (təbiət və heyvan filmləri) ola bilər.
Müsabiqədə iştirak üçün təqdim olunan qısametrajlı filmin xronometrajı 4 dəqiqədən çox olmamalı, əvvəllər hər hansı başqa bir müsabiqəyə təqdim edilməməli, bəşəri, dini və ya milli dəyərlərə xələl gətirməməli, ISESCO-nun üç rəsmi dilindən (ərəb, ingilis və fransız) birində subtitr yazısı ilə verilməlidir.
İştirakçılar filmlərini [email protected] email ünvanına göndərməlidirlər.
ISESCO, həmçinin bəyan edir ki, Üzv Dövlətlərin Milli Komissiyaları və səlahiyyətli tərəfdaşlar mükafatın elan edilməsində iştirak edəcək və qaliblərin seçimi üçün münsiflər heyəti təyin olunacaq. Mükafatlar Mərakeş Krallığının Rabat şəhərində, ISESCO-nun baş qərargahında baş tutacaq xüsusi mərasimdə təqdim ediləcək.
Təqdirəlayiq haldır ki, ISESCO “Distant mədəniyyət” təşəbbüsü çərçivəsində aşağıdakı yaradıcılıq sahələrinin hər biri üzrə üç tələbəyə mükafat ayırıb: Qısa hekayə yazmaq, rəsm çəkmək; və musiqi kompozisiyası və ya digər yaradıcı məhsul yaratmaq. Mükafatlar müvafiq olaraq 6, 4 və 2 min ABŞ dolları məbləğindədir.
Mükafat üzrə nominasiyalarla bağlı suallar Azərbaycan Respublikasının Mədəniyyət Nazirliyi yanında fəaliyyət göstərən ISESCO üzrə Azərbaycan Respublikasının Milli Komissiyasına göndərilməlidir.
