Londonda NATO-nun sammiti baş tutdu
Böyük Britaniyanın paytaxtı London şəhərində NATO-nun növbəti sammiti keçirilib.
Rakus.az xəbər verir ki, Şimali Atlantika Alyansının rəhbər şəxsləri, o cümlədən quruma üzv ölkələrin dövlət və hökumət başçılarının iştirakı ilə keçirilmiş sammitdə Türkiyəni Prezident Rəcəb Tayyib Ərdoğanın rəhbərlik etdiyi geniş tərkibli nümayəndə heyəti təmsil edib.
Hələlik təfərrüatlar məlum olmasa da, sammitin gərgin şəraitdə keçdiyini ifadə etmək mümkündür. Çünki üzv ölkələr, o cümlədən Türkiyə tərəfi NATO çərçivəsində əməkdaşlıqla bağlı mövqelərində qətidirlər. Türkiyə hesab edir ki, qurumun üzv ölkələri terrorçuluqla mübarizədə ədalətli və qətiyyətli mövqe sərgiləməlidirlər. Türkiyə Prezidenti Rəcəb Tayyib Ərdoğan səfər qabağı Ankaranın Esenboğa hava limanında keçirdiyi mətbuat konfransında NATO-nun özünü yeniləməsinin qaçılmaz olduğunu ifadə edib.
Rəsmi Ankaranın sifarişi ilə Rusiyadan alınan S-400 raket əleyhinə kompleksin ölkəyə gətirilməsi və aktivləşdirilməsi bu sammitdə də Türkiyəyə qarşı ittihamlara səbəb olub. Bütün bunlara baxmayaraq, Türkiyə mövzu ilə bağlı qərarının səbəblərini çox güclü faktlar və əsaslı məntiqlə izah etməyə qadirdir.
Sammitdən sonra Türkiyə Prezidenti Rəcəb Tayyib Ərdoğan, Fransa Prezidenti Emmanuel Macron, Almaniya Baş naziri Angela Merkel və İngiltərə Baş naziri Boris Conson dördtərəfli görüş çərçivəsində Suriya böhranını müzakirə ediblər. Tərəflərin İngiltərə hökumətinin binasında keçirilən ilkin açıqlamasına görə görüş səmərəli şəkildə başa çatıb.
