Mələkxanım bibisinin himayəsi altında böyüyüb - FOTO - VİDEO
“Bu ərəfələrdə bir az gərginlik yaşayıram. Bu, bir imtahandır. Biz müharibə illərini yaşamış bir xalqıq. Çətin günlər idi. Düzdür, hələ müharibə şəraitindəyik. İndi də gözəgörünməz, təhlükə saçan virus ilə müharibə aparırıq”.
Rakus.az xəbər verir ki, bu sözləri “Xəzər TV”də yayımlanan “Ay Zaur” musiqili-əyləncəli proqramda qonaq olan Xalq artisti Mələkxanım Əyyubova deyib.
Ailəsindən danışan sənətçi bibisinin himayəsi altında böyüdüyünü açıqlayıb:
“Biz ailədə yeddi uşaq olmuşuq – üç bacı, dörd qardaş. Hökumə adlı bibimin övladı olmayıb. Qardaş və bacılarım yaşca böyük olduğundan onları götürməyib. Mən anamın bətnində olanda nənəm deyib ki, bu qızı verərsən, bibisi saxlasın. Bibim də Bakıda yaşayırdı. Elə o da məni ərə verib. Anam mənə deyirdi ki, sən məndən küskünsən. Anama deyirdim ki, bir də övladın olsaydı, verərdin bibimə. Elə deyirdim ki, onun qəlbini qırmayım”.
Səmimi etirafları ilə diqqət çəkən Mələkxanım qızı Nəzrin Nəcəfovanın nişanlısı haqqında danışıb, evinə gəlin gətirdiyi xanıma qayınanalıq etmədiyini deyib:
“Dörd övladım var. İkisi evlidir. Bu yaxınlarda qızımın nişanını etdik. Toyu olacaqdı, amma məlum səbəblərdən hələ ki qaldı. Gələcək kürəkənim oğlumla Amerikada birlikdə təhsil alıb və onun yaxın dostudur.
Bizim ailəmizdə sevgiyə sərhəd yoxdur. Uşaqlarım kimi sevsələr, onunla da evlənirlər. Altı ildir ki, evimə gəlin gətirmişəm. Gəlinimə qayınanalıq etmirəm. Bir dəfə də onun üstünə qışqırmamışam. Onlar mənimlə birlikdə deyil, ayrı evdə yaşayırlar”. (Oxu.az)
