Niderlandda soydaşlarımız Fransa Senatının qətnamələrinə etiraz etdilər
Niderland Krallığında yaşayan soydaşlarımız Fransa Senatının və Belçika Parlamentinin qəbul etdiyi qətnamələrə etiraz olaraq aksiya keçiriblər.
Rakus.az xəbər verir ki, bu barədə Diasporla İş Üzrə Dövlət Komitəsi məlumat yayıb.
Niderland Krallığında fəaliyyət göstərən Azərbaycan diaspor təşkilatları və bu ölkədə yaşayan azərbaycanlılar, eləcə də türk icmasının nümayəndələri Fransa Senatında və Belçika Parlamentində qondarma Dağlıq Qarabağ Respublikasının tanınması istiqamətində qəbul edilmiş qətnamələrə etiraz olaraq aksiya keçiriblər.
Aksiya iştirakçıları “Qarabağ Azərbaycandır!” “Fransa, erməni terrorunu dəstəkləməyi dayandır!” kimi şüarlar səsləndiriblər. Etiraz aksiyasında Niderland Azərbaycan-Türk Mədəniyyət Dərnəyinin başçısı İlhan Aşkın, Benilüks Azərbaycanlıları Konqresinin sədri Elsəvər Məmmədov, Niderland-Belçika Azərbaycanlıları Koordinasiya Şurasının əlaqələndiricisi Maisə Ağamirzəyeva , BAK-ın əlaqələndiricisi Lamiyə Babayeva çıxış edərək Fransa və Belçikanı haqlı mövqe sərgiləməyə, eləcə də terroru və separatçılığı dəstəkləməməyə çağırıblar. Sonda diaspor fəalı Şamil Mustafayev çıxış edərək Azərbaycan diasporu tərəfindən hazırlanan etiraz məktubunun Fransa səfirliyinə təqdim ediləcəyini bildirib.
