Karantinlə bağlı polis nəzarəti davam edir - FOTO
Daxili işlər orqanlarının əməkdaşları Bakı, Gəncə, Lənkəran və Sumqayıt şəhərlərinin, Abşeron, Yevlax, İsmayıllı, Kürdəmir və Salyan rayonlarının ərazilərində karantin rejiminin sərtləşdirilməsi ilə bağlı tələblərə əməl olunmasına nəzarəti davam etdirir.
Rakus.az xəbər verir ki, sərtləşdirilmiş karantin rejiminə polis əməkdaşları və Daxili Qoşunların hərbi qulluqçuları tərəfindən nəzarət edilir. Xidməti avtomobillərlə xüsusi səsgücləndirici qurğu vasitəsilə vətəndaşlara karantin rejimi ilə bağlı məlumatlar verilir.
Polis əməkdaşları, həmçinin avtopatrul və piyada marşrutları ilə də xidmətlərini davam etdirirlər. Paytaxtın müxtəlif ərazilərində qurulan müvəqqəti postlarda yol polisi əməkdaşları avtomobilləri saxlayaraq icazələrinin olub-olmamasını yoxlayırlar.
Sərtləşdirilmiş karantin rejimi qaydalarını pozan şəxslər aşkarlandıqda isə onlar Azərbaycan Respublikası İnzibati Xətalar Məcəlləsinin müvafiq maddələri ilə inzibati məsuliyyətə cəlb olunurlar.
İyunun 14-də saat 00:00-da Bakı, Gəncə, Lənkəran və Sumqayıt şəhərlərinin, Abşeron, Yevlax, İsmayıllı, Kürdəmir və Salyan rayonlarının ərazisində sərtləşdirilmiş karantin rejimi başlayıb.
Nazirlər Kabineti yanında Operativ Qərargahın qərarına əsasən, sərtləşdirilmiş karantin rejimi ilə əlaqədar həmin şəhər və rayonlarda bütün iş, xidmət və ticarət sahələri üzrə fəaliyyət, eyni zamanda, ictimai nəqliyyatın və avtomobillərin hərəkəti dayandırılıb. Əhalinin yaşayış yerlərini və ya olduğu yerləri tərk etməsi qadağan olunub. Sakinlər qeyd olunan müddətdə yaşayış yerlərini və ya olduğu yerləri həyat və sağlamlığa bilavasitə təhlükəli vəziyyət yarandığı halda, eləcə də təxirəsalınmaz tibbi yardıma ehtiyac olduqda yalnız təcili tibbi yardım xidməti vasitəsilə tərk edə bilərlər. Yaxın qohumların dəfnində iştirak etmək üçün isə icazə Daxili İşlər Nazirliyinin Növbətçi Hissələri İdarəetmə Xidmətinin 102 Xidməti – Zəng Mərkəzi vasitəsilə alına bilər.
Sərt karantin rejimi iyunun 16-sı saat 06:00-dək davam edəcək.
Xatırladaq ki, xüsusi karantin rejiminin tələblərinin pozulmasına görə fiziki, hüquqi və vəzifəli şəxslər Azərbaycan Respublikasının qanunvericiliyi ilə nəzərdə tutulmuş qaydada inzibati və cinayət məsuliyyəti daşıyırlar.
