Mədəni 14.12.2019 21:00

Opera və Balet Teatrı Xuraman Qasımovanın ittihamlarına cavab verdi - FOTO

Ölçü

A+ A- A

Azərbaycan Dövlət Akademik Opera və Balet Teatrı Xalq artisti Xuraman Qasımovanın dkabrın 13-də Axşam.az saytında səsləndirdiyi ittihamlara cavab verib.

Rakus.az xəbər verir ki, açıqlamada deyilir: “X.Qasımovanın səsləndirdiyi fikirlərin heç biri həqiqətə uyğun deyil. Qasımova bildirir ki, onu və bacısı Fidan Qasımovanı cavan qız ikən teatrdan uzaqlaşdırıblar. Nəzərə alsaq ki, Xuraman və Fidan Qasımovalarla əmək müqaviləsinə 2005-ci ildə xitam verilib, o zaman F.Qasımovanın 58 (1947-ci il təvəllüdlüdür), X.Qasımovanın isə 54 yaşı (1951-ci ildə doğulub) var idi. Həm də onlara heç kəs burada çıxış etməyi qadağan etməmişdi, sadəcə onlar repertuarda məşğul olmadıqlarına görə, ştatdan azad edilib, tamaşa haqqı ödənilməklə işə keçirilmişdilər. Onlar bununla razılaşmaq istəmirdilər, ona görə ki, illərlə səhnəyə çıxmadıqları halda hər ay müftə əmək haqqı almaq istəyirdilər.

Nigar Şabanovanın bəyanatına gəldikdə, o artıq öz cavabını alıb, ona cavab verən Xalq artistlərini heç kəs məcbur edib efirə göndərməmişdi, onlar öz təşəbbüsləri ilə verilişə çıxıb həqiqəti söyləmək istəmişdilər. Gənclərə qayğı məsələsi Opera və Balet Teatrında ən yüksək səviyyədədir. Layiq olanlar bu teatrın səhnəsində öz yerini tutur və onların inkişaf etməsi üçün teatr rəhbərliyi hər cür şərait yaradır. Son 20-25 il ərzində Opera və Balet Teatrının səhnəsində ilk addımlarını atan gənclərin bir çoxu bu gün artıq yüksək fəxri adlar daşıyırlar, müxtəlif beynəlxalq mükafatlara layiq görülüblər, səsləri dünyanın mötəbər teatr və konsert salonlarından eşidilir. Xuraman Qasımova bu həqiqətləri görmək istəmir və ya görməməzliyə vurur. Bir daha təkrar etmək istəyirik ki, teatrımızın səhnəsinə heç kəs pul ödəyib gəlmir, burada çıxış etdiklərinə görə onlara pul verilir”.

Teatr Xuraman Qasımovanın “Opera Teatrında səviyyəsiz tamaşalar çoxdur” ittihamına isə belə cavab verib: “Əgər, Qasımova 2005-ci ildən bu yana teatra gəlmirsə, tamaşaların səviyyəsi barədə necə mühakimə yürüdə bilər? Opera və Balet Teatrının tamaşalarında xarici qonaqlar, diplomatik korpus nümayəndələri, səfirlər, Azərbaycan elitasının nümayəndələri vaxtaşırı iştirak edirlər. Əgər tamaşaların səviyyəsi onları qane etməsə, onlar təkrarən teatra gələrlərmi? Fikir söyləmək üçün teatra gəlmək və tamaşalarda iştirak etmək lazımdır.

X.Qasımova “Koroğlu” tamaşası haqqında danışır, atın səhnədə süründüyünü iddia edir. “Koroğlu” operasının hər bir tamaşası “Mədəniyyət” kanalı ilə lentə alınır və sonradan televiziyada nümayiş olunur. Nədənsə, atın süründüyünü heç kəs müşahidə etməyib, gülünc və cəfəngiyyat dolu fikirdir. Bu at Teatrın şəxsi atı deyil, o hər dəfə İdman və Gənclər Nazirliyinin tabeliyində olan Atçılıq idmanı və Müasir Beşnövçülük üzrə İOEUPM-dən icarəyə götürülür və qeyd etmək lazımdır ki, hər dəfə Teatra ən yaxşı cins atlar göndərilir”.

Mətbuat xidməti Xalq artistinin “Teatr bu dəqiqə Sumqayıtdan kənara çıxmır” fikrini ağ yalan adlandırıb: “Teatr nəinki Sumqayıtdan kənara çıxır, hətta Azərbaycanın hüdudlarından çox-çox kənarda belə qastrol səfərlərində olur. Teatrın muğam və balet truppaları, simfonik orkestri bir çox yaxın-uzaq ölkələrdə – Rusiya Böyük Teatrı, Sankt- Peterburqun Marinski Teatrı, Belarusun Böyük Akademik Opera və Balet Teatrı, Türkiyənin İstanbul və Ankara Opera və Balet Teatrları, Fransa, Almaniya, Qətər və sairə ölkələrdə çıxış edib və etməkdədir.

Ümumiyyətlə, başdan-başa yalan və iftiralarla dolu olan bu müsahibəni verməklə X.Qasımovanın özünü ictimaiyyətin yadına salmaq və xatırlatmaq məqsədi güddüyünü düşünürük, başqa cür ola bilməz. Opera və Balet Teatrının fəaliyyəti haqqında həqiqətləri daimi tamaşaçılar çox yaxşı bilir, kim bu həqiqəti bilmirsə, onları da tamaşalarımıza dəvət edirik”.