Pompeo Aİ-ni rüsum tətbiq etməməyə çağırdı
ABŞ Avropa İttifaqının Amerika mallarına rüsum tətbiq etməməsini və istehsalçılar üçün bərabər şərait yaradılmasını istəyir.
Rakus.az xəbər verir ki, ABŞ-ın dövlət katibi Maykl Pompeo bu barədə “Rheinische Post” qəzetinə müsahibəsində deyib. “Biz Avropanın Amerika məhsullarına cərimə rüsumu tətbiq etməsini, ABŞ-a qarşı ədalətsiz ticarət addımları atmasını istəmirik”, – deyə o bildirib.
Onun sözlərinə görə, Prezident Donald Tramp ədalətli qarşılıqlı ticarət tərəfdarıdır. ABŞ öz kənd təsərrüfatı məhsullarını Avropada görmək istəyir. Bu, Amerika və Avropa İttifaqı arasında qarşılıqlı sərfəli ticarət münasibətlərinin davam etməsi üçün vacib şərtlərdən biridir.
Xatırladaq ki, Vaşinqton 2018-ci il iyunun 1-də Kanada, Meksika və Avropa İttifaqı ölkələrindən idxal olunan polad və alüminium məmulatlarına müvafiq olaraq 25 faiz və 10 faiz rüsum tətbiq edib. Onlar isə öz növbələrində ABŞ-a qarşı cavab tədbirləri görüb. Donald Tramp, həmçinin Amerika kompaniyalarına qarşı ticarət maneələri aradan qaldırılmayacağı təqdirdə Aİ ölkələrində istehsal olunacaq avtomobillərə əlavə rüsumlar tətbiq etməklə hədələyib.
ABŞ Prezidenti mayın 18-dək avtomobillərin və avtomobil istehsalı üçün ehtiyat hissələrin idxalına 25 faiz həcmində rüsum tətbiq edib-etməmək barədə qərar verməli idi. Lakin Donald Tramp ticarət tərəfdaşları ilə bu mövzu ətrafında danışıqları davam etdirmək məqsədilə rüsumların tətbiqini 180 gün müddətinə təxirə salıb.
