Publisist Araz Yaquboğlu AJB və AAB-a üzv qəbul edilib - FOTO
Araz Yaquboğlu Azərbaycan Jurnalistlər Birliyinə (AJB) və Azərbaycan Aşıqlar Birliyinə (AAB) üzv qəbul edilib.
Rakus.az xəbər verir ki, bu barədə şair Aqşin Hacızadə sosial media səhifəsində paylaşım edib:
“Salam əziz və dəyərli dostlar, qohumlar. Bu gün aldığım çox sevindirici bir xəbəri sizinlə bölüşməyi və edəcəyim təbriki sizlərlə birlikdə ünvanına göndərməyi qərara aldım. Belə ki, 20 ildən çox bir zamanda dəyərli araşdırmaları, elmi, publisistik, o cümlədən maraqlı xatirə yazıları ilə mütəmadi olaraq qəzet, jurnal, internet resurslarında çap olunan, onlarla kitabın müəllifi və redaktoru, 2011-ci ildən “Laçın yurdu” jurnalının baş redaktorunun müavini, “Laçın” döş nişanı, “Dədə Ələsgər Ocağı” İctimai Birliyinin Fəxri fərmanı və “Aşıq Ələsgər – 200” yubiley medalı ilə təltif olunmuş, o cümlədən də Azərbaycan dilində olan Vikipediyanın, Vikikitabın, Vikisitatın və Vikimənbənin idarəçisi olan, çox hörmətli Araz Yaquboğlu 12 iyul 2023-cü il tarixində Azərbaycan Jurnalistlər Birliyinə, 17 iyul 2023-cü il tarixində isə Azərbaycan Aşıqlar Birliyinə üzv qəbul edilmişdir. Birmənalı şəkildə qeyd edim ki, bu Araz müəllimin çoxdan haqq etdiyi bir addır. Bu mənada onu ürəkdən təbrik edir və ona yaradıcılığında yeni nailiyyətlər arzulayır, jurnalist olaraq daha uca məqamlar diləyirəm.”
Aqşin Hacızadə eyni zamanda statusunda Araz Yaquboğlunu şeirlə də təbrik edib:
Təbrik üçün Yaquboğlu Arazı,
Sevincimiz qoşa gəlir bu günlər.
Zəhmətinə, zəkasına dəyər tək,
Qəlb oxşayır, xoşa gəlir bu günlər.
Şükür olsun, belə yazıb Yaradan,
Ömrə-günə sanki təzdən doğur dan.
Ard-ardına iki böyük uğurdan,
Şair könlüm cuşa gəlir bu günlər.
Ayrılma gəl bir an belə qələmdən,
Sən ilham al, yaz vətəndən, yaz eldən.
Günlər var ki, dəyərlidi yüz ildən,
Yaşa Araz, yaşa, gəlir bu günlər.
