İrəvanı narahat edən Qərbi Azərbaycan havası
Qərbi Azərbaycan Xronikası layihəsi çərçivəsində jurnalist Əsgər İbrahimovun təqdimatında növbəti analitik süjet hazırlanıb.
Ermənistan 300 minə yaxın Qərbi azərbaycanlını niyə qəbul etmir?
Rakus.az xəbər verir ki, “Qərbi Azərbaycanın hava durumu İrəvanı narahat edir” adlı süjetdə bütöv Azərbaycandan müxtəlif vasitələrlə qoparılan şəhər və rayonların hava proqnozlarının televiziyalarda elan olunmasının dünya azərbaycanlılarının öz dədə-baba yurd yerlərini yaddan çıxarmaması baxımından əhəmiyyətli sayılır, bunun indiki Ermənistanın ərazi bütövlüyünün pozulması, yaxud o ölkəyə qarşı ərazi iddiası irəli sürmək kimi başa düşülməməsi vurğulanır.
Bildirilir ki, Baku TV-nin hava proqnozu ilə bağlı Qərbi Azərbaycanda yerləşən şəhər və rayonların hava durumu ilə əlaqədar məlumatı rəsmi İrəvanı narahat edib: “Ermənistan Xarici İşlər Nazirliyinin sözçüsü Ani Badalyan tviter səhifəsində bu barədə yazıb ki, Bakı televiziyası hava xəbəri zamanı Ermənistanı, o cümlədən paytaxt İrəvanı Azərbaycanın bir hissəsi kimi təqdim edir. Bu qonşu ölkənin suverenliyinə yönəlik ərazi iddialarının növbəti açıq təbliğatıdır. Pis illüziyalar və düşmənçilik ritorikası qəti şəkildə rədd edilməlidir”.
Süjetdə Ani Badalyanın mənsub olduğu etnik qrupun başqa nümayəndələri kimi, “öz gözündə tiri görməyənlər”dən olduğu, onun və yeni nəsil ermənilərin yanlış və zəhərli türk düşmənçiliyi ideologiyasına hələ dərindən yoluxmadıqları üçün reallığı, həqiqəti daha tez qəbul etmək şansları olduğu diqqətə çatdırılır.
Qeyd olunur ki, ermənilər hələ də Qərbi Azərbaycan torpaqlarının onlara məxsus olmadığını başa düşmək istəmirlər: “Son 35 ildə 250 mindən çox qərbi azərbaycanlını dədə-baba yurdlarından didərgin saldıqlarının fərqində deyillər. Onlar 300 minə yaxın yerli sakini vətənsiz və vətəndaşsız qoymağın məsuliyyətini dərk etmək istəmir, ümumiyyətlə, bu məsələni unutmağa çalışırlar. Ancaq bu gün qərbi azərbaycanlıların pozulmuş hüquqlarının bərpası məsələsi günün reallığıdır”.
Sonda Ermənistanın Baş naziri Nikol Paşinyanın Ağrı dağının ermənilərə aid olmadığını etiraf etməsi, Ani Badalyan kimi bu etnos daşıyıcılarının zəhərlənmiş beyinlərinin hələ uzun müddət yuyulmasına ehtiyac duyulduğu bildirilir.
Xatırladaq ki, Qərbi Azərbaycan Xronikası layihəsinin məqsədi tarixi qədim torpaqlarımızın adının yaşadılması, tanıdılması, həmçinin azərbaycanlıların ermənilər tərəfindən deportasiyaya məruz qoyulmasından, həmin ərazilərdə mövcud olmuş, lakin adı silinən toponimlərin, saysız-hesabsız yeraltı və yerüstü maddi mədəniyyət nümunələri – qədim yaşayış məskənləri, nekropollar, kurqanlar, qala, saray və istehkam qalıqları, karvansaralar, körpülər, qəbirüstü sənduqələr, xaçdaşlar, at-qoç heykəlləri, məbəd, kilsə, məscid, pir və ocaqların üzə çıxarılması, həmin ərazinin təmiz oğuz-türk məskənləri olduğunu təsdiq edən faktların dünya ictimaiyyətinə çatdırılmasıdır.
Həmçinin Prezident İlham Əliyevin Qərbi Azərbaycanla bağlı dediyi “XX əsrin əvvəllərinə təsadüf edən xəritə bir daha onu göstərir ki, Qərbi Azərbaycan tarixi Azərbaycan diyarıdır, şəhərlərin, kəndlərin adları Azərbaycan mənşəlidir və biz yaxşı bilirik ki, indiki Ermənistan ərazisində tarix boyu Azərbaycan xalqı yaşayıb. İndi əsas vəzifə ondan ibarətdir ki, dünya ictimaiyyəti də bunu bilsin”, – fikrini əsas tutaraq Qərbi Azərbaycan İcmasının hazırladığı Qayıdış Konsepsiyasında irəli gələn vəzifələrin təbliğidir.
Bundan əlavə, Qərbi Azərbaycanla bağlı tarixçilərin, araşdırmaçıların düşüncələrini, deportasiyaya məruz qalmış şəxslərin həyat hekayəsini işıqlandırmaqdır.
Süjet avqustun 3-də saat 19:30-da Baku Tv-nin efirində və Youtube kanalında yayımlanıb.
