“Qıpçaqlar Qafqazda Albaniya sivilizasiyasını yaradıblar” - VİDEO

Qərbi Azərbaycan Xronikası layihəsi çərçivəsində sənətşünaslıq üzrə fəlsəfə doktoru Elçin Əlibəylinin təqdimatında “İrsimiz” rubrikasının növbəti buraxılışı hazırlanıb.

Rakus.az xəbər verir ki, “Qafqazın ən qədim sakinləri qıpçaq türkləridir” adlı buraxılışda Dünya Türkologiya Mərkəzinin sədri, tarix elmləri doktoru Güllü Yoloğlu qıpçaqlara məxsus olan Albaniyanın tarixi və mədəniyyətinə erməni təcavüzündən söz açıb.

O bildirib ki, türk dədələrimiz Altaydan gəlmə deyillər: “Türklərin on faizi qıyıq gözdülər. Xakasiyaya atçılığı, əkinçiliyi Xəzər ətrafından köçən türklər gətirib. Azərbaycan ərazisindəki türk kurqanları Sibirdəkilərdən daha qədimdir. Hunların IV əsr köçü zamanı türklər Qafqaza qayıdıb”.

Onun sözlərinə görə, hunların tərkibində Kimmerlər də Qafqaza qayıdıb: “Kimmerlər Qafqazdan Sibirə gedib, Kemerovo şəhərini salıblar”.

Tarixçi deyib ki, Qafqazın ən qədim sakinləri qıpçaq türkləridir: “Rusiya alimlərinin araşdırmasına görə, türklər Sibirə gəlmədir. Rusiya alimlərinin tədqiqatı Altay nəzəriyyəsini darmadağın edib”.

G.Yoloğlu qıpçaqların olan Albaniyanın tarixi və mədəniyyətinə erməni təcavüzündən danıçıb və deyib ki, qıpçaqlar Qafqazda Albaniya sivilizasiyasını yaradıblar.

Xatırladaq ki, Qərbi Azərbaycan Xronikası layihəsinin məqsədi tarixi torpaqlarımızın adının yaşadılması, tanıdılması, həmçinin azərbaycanlıların ermənilər tərəfindən deportasiyaya məruz qoyulmasından, həmin ərazilərdə mövcud olmuş, lakin adı silinən toponimlərin, saysız-hesabsız yeraltı və yerüstü maddi mədəniyyət nümunələri – qədim yaşayış məskənləri, nekropollar, kurqanlar, qala, saray və istehkam qalıqları, karvansaralar, körpülər, qəbirüstü sənduqələr, xaçdaşlar, at-qoç heykəlləri, məbəd, kilsə, məscid, pir və ocaqların üzə çıxarılması, həmin ərazinin təmiz oğuz-türk məskənləri olduğunu təsdiq edən faktların dünya ictimaiyyətinə çatdırılmasıdır.

Həmçinin Prezident İlham Əliyevin Qərbi Azərbaycanla bağlı dediyi “XX əsrin əvvəllərinə təsadüf edən xəritə bir daha onu göstərir ki, Qərbi Azərbaycan tarixi Azərbaycan diyarıdır, şəhərlərin, kəndlərin adları Azərbaycan mənşəlidir və biz yaxşı bilirik ki, indiki Ermənistan ərazisində tarix boyu Azərbaycan xalqı yaşayıb. İndi əsas vəzifə ondan ibarətdir ki, dünya ictimaiyyəti də bunu bilsin”, – fikrini əsas tutaraq, Qərbi Azərbaycan İcmasının hazırladığı Qayıdış Konsepsiyasından irəli gələn vəzifələrin təbliğidir.

Bundan əlavə, Qərbi Azərbaycanla bağlı tarixçilərin, araşdırmaçıların düşüncələrini, deportasiyaya məruz qalmış şəxslərin həyat hekayəsini işıqlandırmaqdır.

Veriliş iyunun 21-də saat 20:30-da Baku Tv-nin efirində və saat 21:30-da Youtube kanalında yayımlanıb.