Rusiya boksçuları bayraqsız iştirakdan imtina etdilər
Boks üzrə Rusiya yığması 2020-ci ildə Yaponiyanın paytaxtı Tokioda keçiriləcək Yay Olimpiya Oyunlarında milli bayraqsız iştirakdan imtina edib.
Rakus.az xəbər verir ki, bunu ölkənin boks federasiyasının baş katibi Umar Kremlyov açıqlayıb.
O bildirib ki, boksçular ölkənin bayrağı olmadan yarışa qatılmaq istəmirlər: “Bizim üçün ən başlıcası, boksçularımızın Rusiya bayrağı altında görünmələri və himnimizin səsləndirilməsidir. Bunsuz iştirak etməyin mənası yoxdur. Boksçular xahiş edir ki, məhkəmələr vasitəsilə bayraq altında çıxış etmək hüququna nail olaq”.
Qurum rəsmisi bildirib ki, Milli Olimpiya Komitəsi və Rusiya Antidopinq Agentliyinin atacağı addımları izləyəcək federasiya durumu təhlil edəcək. Onlar rusiyalı boksçuların bayraq altında çıxış etməsini və himnin çalınmasını vacib sayır: “Bunsuz iştirakın mənası yoxdur”.
Qeyd edək ki, Ümumdünya Antidopinq Agentliyi rusiyalı idmançıların 4 il ərzində ölkənin bayrağı altında dünya çempionatları, Olimpiya və Paralimpiya Oyunlarına qatılmasına qadağa qoyub.
