“Şahdəniz 2” layihəsi üzrə hasilat üçün 20 quyu qazılıb – BP
Bu ilin üçüncü rübü ərzində “Şahdəniz 2” layihəsi “Xankəndi” sualtı tikinti gəmisi vasitəsilə sualtı quraşdırma işlərini plana uyğun davam edib.
Rakus.az xəbər verir ki, “BP Azərbaycan”ın məlumatına görə, borudüzən gəmi vasitəsilə şərq-cənub cinahına bağlanan axın xətlərinin mexaniki quraşdırılması 8 oktyabrda təhlükəsiz şəkildə başa çatıb.
Dərinsulu şərq-cənub cinahından hasilatın başlanması dənizdə quraşdırma və istismar sınaqları bitdikdən sonra 2021-ci ilin birinci yarısına planlaşdırılır. Digər iki dərinsulu cinahdan (qərb-cənub və şərq-şimal) hasilatın başlanması gələcək illərə planlaşdırılır və hasilatın planlaşdırılan ən yüksək sabit səviyyəsinə nail olmağı təmin edəcək.
Bildirilib ki, üçüncü rübdə “Şahdəniz Alfa” platformasından quyu qazılmayıb, bu müddət ərzində platformanın qazma qurğusunda profilaktik işlər aparılıb.
Müvafiq dövr ərzində “Şahdəniz 2” layihəsi çərçivəsində hasilat və sonrakı artım üçün ümumilikdə 20 quyu qazılıb və bunlardan 16-sı tamamlanıb. Qazma işləri hasilatın planlaşdırılan ən yüksək sabit səviyyəsinə nail olmaq üçün tələb olunan bütün quyuların qazılması istiqamətində davam edəcək.
Şəfəq-Asiman dəniz blokunda ilk kəşfiyyat quyusunun qazma işləri artıq 3864 metr dərinliyə çatıb və hazırda qazma əməliyyatları davam edir. Eləcə də, D230 blokunda oktyabr ayında emal prosesi tam başa çatdırılıb və hazırda perspektiv strukturun qiymətləndirilməsi işləri aparılır.
Abşeron yarımadasının dayazsulu hissəsi üzrə hasilatın pay bölgüsü sazişi ərazisində seçilmiş yerlərdə ilk kəşfiyyat quyusunun qazılması işlərinin planlaşdırılması davam edir.
Quyu üzrə Ətraf Mühitə və Sosial-iqtisadi Sahəyə Təsirin Qiymətləndirilməsi sənədinin hazırda hökumət və ictimaiyyətlə müzakirələri davam edir. Sənədin təsdiqi ilə müvafiq icazələr alınmaqla quyunun qazılmasına 2021-ci ilin birinci rübündə başlanacaq.
