“Sanki Nəsibə Zeynalovanın özü idi…” - FOTO
Biri var teatrsevərlər, biri də var teatra zorla gedənlər. İndi deyəcəksiz teatra kim zorla gedər? Ancaq inanın, bəzən belə olur. Mən teatrın seyrindən elə sehrə qapılıram ki, ayılanda artıq özümü ayaq üstə səhnəni alqışlayan tapıram. Bilmirəm, bu aktyorların məharətindən yoxsa teatrın sehrindəndi.
Neçə vaxtdır, teatra getmirdim. Bir qədər öncə Qısa Tamaşalar Festivalı çərçivəsində Gürcüstan aktyorlarının ifasında rus yazıçısı Lev Tolstoyun “Kreyser Sonatası”nı izləyə bildim. Təsirindən ayılmamış ikinci tamaşada iştirak etdim.
Özbəkistanın Kattakurqan Şəhər Dram Teatrının ifasında özbək dilində Azərbaycanın klassik səhnə əsəri olan “Qayınana” komediyası Azərbaycan Dövlət Akademik Musiqili Teatrının səhnəsində nümayiş edildi. Rejissor Əsgər Əsgərovun quruluşunda təqdim edilən tamaşada Cənnət obrazını Özbəkistan Respublikasının “Dostluq” ordenli aktrisası Gülbahar Məmmədova ifa etdi.
Tamaşada diqqətimi çəkən nüansı qeyd etməliyəm. Qayınana rolunu ifa edən Gülbahar xanım ölməz sənətkarımız Nəsibə Zeynalovanın oxşarı deyil, sanki özüydü. Möhtəşəm ifa, gözəl mimika ilə yadda qaldı. Bu arada bir daha anladım ki, türk xalqlarının dili bir-birinə çox bənzəyir. Daha gürcü dilində gedən tamaşada olduğu kimi böyük ekranda tərcümə əks olunmurdu. “Qayınana”nın süjetini həm də əzbər bilirik deyə hansısa tərcüməyə də ehtiyac duyulmurdu.
Anlamayan da tapıldı. Arxamda əyləşən bir cüt xanım tamaşanın lap əvvəlindən sonuna qədər “heç nə başa düşmürük” deyib gülüşdülər. Biri başını qoyub yatdı, digəri dayanmadan telefonla oynadı. Diqqətimi dağıda bilmədilər, yüngülcə əsəb keçirtdim sadəcə. Mənim hələ teatrın mənasını anlamayan iki azyaşlı övladım isə sakitcə oturub tamaşanı izlədi. Deməli, gələcəyin 2 teatrsevəri yetişməkdədir.
Xumar Şahin
