Şəhid Elimdar Səfərov qəhrəmanlıq simvolu idi - FOTO
“Ana səni çox istədiyim qədər torpağımı, Vətənimi də çox istəyirəm”.
Bu sözlər Aprel döyüşlərində qəhrəmancasına şəhid olan Xüsusi Təyinatlı bölüyün giziri Elimdar Səfərova aiddir.
Səfərov Elimdar Səlimxan oğlu 1992-ci il iyulun 26-da Yardımlı rayonunda anadan olub. Elimdarın bir yaşı olanda-yəni 1993-cü ildə ailəsi ilə birlikdə Neftçala rayonunun Aşağı Qaramanlı kəndinə köçürlər. Elimdar 1998-ci ildə Neftçala rayonu Sakit Kərimov adına Qədimkənd kənd orta məktəbinin birinci sinifinə gedib. 2009-cü ildə məktəbi bitirir və 2010-cu ilin oktyabr ayında həqiqi hərbi xidmətə gedir. Sonradan o Xüsusi Təyinatlı Qüvvələr kursu keçmək üçün N saylı hərbi hissəyə ezam olunur.
Elimdar Səfərov hərbi xidməti başa vurduqdan sonra yenidən öz arzusu ilə Azərbaycan Ordusunun sıralarına qayıdır. Xidmətdə fərqləndiyi üçün komandanlıq tərəfindən bir sıra mükafatlar, medallarla təltif olunub. Axı Elimdar hərbçi peşəsini çox sevirdi. Onun ürəyində bir arzusu var idi. İşğal altındakı torpaqlarımızın qaytarılması. ANA, Vətən, torpaq sevgisi ilə ürəyi döyünən Elimdar azda olsa arzusuna çatır.
2016-cı ilin martından başlayaraq, Ermənistan silahlı qüvvələrinin birləşmələri cəbhəboyu zonadakı yaşayış məntəqələrini daha sıx atəşə tutmağa başlamışdı. Vəziyyəti gərginləşdirmək məqsədilə erməni hərbi birləşmələri artilleriya qurğularından həm döyüş mövqelərimizi, həm də təmas xəttinə yaxın olan yaşayış məntəqələrini atəşə tuturdu. Düşmən aprelin 2-nə keçən gecə bütün mövqelərimizi, eyni zamanda, mülki əhalini atəşə tutub. Azərbaycan tərəfindən dərhal adekvat tədbirlərin görülməsi ilə bağlı qərar qəbul edilib və qəti cavab zərbələri endirilib. Düşmən müdafiəsinin ön xəttində və dərinliyində yerləşən koordinatlar müəyyənləşdirilib, Ermənistan ordusunun canlı qüvvəsi və hərbi texnikası məhv edilib.
Aprel hadisələrində cəbhənin ən gərgin istiqaməti Ağdərə-Tərtər-Ağdam və Füzuli istiqaməti olub. Azərbaycan Silahlı Qüvvələrinin bölmələri aprelin əvvəlində qısa müddətdə düşmənin ön və dərinlikdə cəmləşən qüvvələrini müəyyənləşdirib və qəti zərbələrlə sıradan çıxarıb. Uğurlu əməliyyatlar nəticəsində Naftalan şəhərinə təhlükə yaradacaq Talış kəndi istiqamətindəki yüksəkliklər işğalçılardan təmizləndi. Həmçinin Horadiz şəhərinin düşmən təhlükəsindən qorunması məqsədilə Füzuli rayonu istiqamətində yerləşən, geniş ərazini nəzarətdə saxlamaq imkanı verən olduqca strateji əhəmiyyətli Lələtəpə yüksəkliyi də ələ keçirilib. Bu uğurları təbii ki, Azərbaycan Ordusu, Azərbaycanın qəhrəman oğulları qazanıb. Elə qəhrəmanlarımızdan biridə Elimdar Səfərovdur.
Talış kəndi istiqamətindəki döyüşlərdə Elimdar da iştirak edirdi. Buradakı postların alınmasında o, çox böyük fədakarlıq göstərərək düşmən əsgərlərini məhv edib, yaralı yoldaşlarını döyüş meydanından çıxarıb. Amma düşmən gülləsi Elimdardanda yan keçmir. O, aprelin 2-də qəhrəmancasına şəhidlik zirvəsinə ucalıb.
Şəhid Elimdar Səfərov aprelin 4-də yaşadığı Neftçala rayon Aşağı Qaramanlı kəndində böyük izdihamla dəfn edilib.
Elimdar Səfərov ölümündən sonra Prezident İlham Əliyevin Sərəncamı ilə “Hərbi xidmətdə fərqlənməyə görə” üçüncü dərəcəli medalı ilə təltif edilib.
Elimdarın qəhrəmanlığından danışan onun döyüş yoldaşı və yaxın dostu (Müəyyən səbəblərə görə adını açıqlamırıq) deyir ki, Talış kəndi istiqamətində düşmən postunun alınmasında onun böyük əməyi olub. Elimdar şəhid olmamışdan əvvəl bizim birinci şəhidimiz Dilsuz Qarayev oldu. Söhbət əsnasında sanki Elimdar agah olmuşdu ki, o da şəhid olacaq. Dedi ki, Dilsuz şəhid oldu, yazıq anası, necə dözəcək bu dərdə. Bunu dedikdən sonra sanki bir anlığa durdu və dedi: “Mən şəhid olsam anamı tək qoymayın. Anamdan müğayət olun. O mənsizliyə dözməz”. Mən və döyüş yoldaşları Elimdarın yoxluğunu azda olsa bacardığımız gədər hiss elətdirmirik.
Elimdar postun alınmasında çox fədakarlıqlar edib. Bunların hamsını mən öz gözlərimlə görmüşəm. Kimlərsə o qəhrəmanlıqları kinolarda görüb. Amma Elimdar onu real edirdi. Onun dəfələrlə ad gününü işğal altında olan torpaqlarda geyd edmişik. Həmişə deyirdi ki, mən bu torpaqların azad olunması üçün dünyaya gəlmişəm. Ən böyük arzusu da o idi ki torpaqlar azad olunsun, Şuşada doğum gününü qeyd etsin. Ona nəsib olmadı, amma onun döyüş yoldaşları, dostları, biz davamçıları onun arzusunu həyata keçirəcəyik. İnşallah torpaqlarımız tezliklə azad olunacaq və Elimdarın doğum gününü orda geyd edəcəyik.
Elimdarın anası Amanə xanım deyir ki, o uşaqlıqdan vətənpərvər və qayğıkeş olub. Elimdarın atası rəhmətə gedəndən sonra o qardaş və bacısına atasızlığı bildirməyib. Hələ kiçik yaşlarından ailənin bütün qayğıları ilə maraqlanıb, işləyib bizi dolandırıb. Elimdar bizi heç vaxt çətinliklərlə üz-üzə qoymayıb. O atasının ölümünü, nə də ailənin başçısının olmadığını bizə hiss etdirmirdi. Hər birimizlə ayrı-ayrılıqda maraqlanardı. Qoymazdı ki, nədənsə çətinlik çəkək. Mən həmişə onunla fəxr edirdim. Körpəliyindən başmı üca edirdi. Ölümü ilədə başımı uca etdi. O ailəsini, qardaşını bacısını canından çox istəyirdi. Qardaşından balaca olsa da ona atalıq edirdi. Qardaşının bütün çətinliklərini həll edərdi. Arzusuna çatdı. Həmişə deyirdi ki, ana səni necə çox istiyirəmsə, torpağımı da, Vətənimi də elə istəyirəm.
Elimdarın şəhidlik zirvəsinə yüksələsindən üç il keçsə də xatirəsi unudulmur. Şəhid Xüsusi Təyinatlı gizir Elimdar Səfərovun əziz xatirəsinin yaşadılması məqsədilə qardaşı və ailə üzvləri tərəfindən park yaradılıb. “Şəhidlər” parkında Neftçaladan olan şəhidlərinin adı əbədiləşdirilib, Elimdarın büstü qoyulub.
Bir sözlə şəhidimizin ailə üzvləri, dostları Elimdarın adının yaşadılması üçün əllərindən nə gəlirsə edirlər.
Elimdarın arzularını reallaşdırmaq üçün qardaşı əlindən gələn nə varsa əsirgəmir, kəndlərindəki məscidi təmir edib, həyətində Elimdarın adına fəvvarə tikdirib. Bir sözlə hər an şəhid qardaşını yaşadmağa çalışır. Elimdarın adının yaşadılması üçün qardaşı oğluna Elimdarın adını qoyub. İndi o evdə balaca Elimdar böyüyür.
Bundan başqa Elimdarın qardaşı Elzibar Səfərov şəhidin doğum günündə imkansız ailələrin uşaqlarını müsəlman edir. Bu il isə Elimdarın 27 yaşı olması ilə əlaqədar 27 uşağı sünnət edəcək.
Gizir Elimdar Səfərovun qəhrəmanlıqlarının yaşadılması üçün ev muzeyi də yaradılıb.
Elimdarın iyulun 26-sı doğum günüdür. Yaşasaydı 27 yaşını qeyd edəcəydi. Lakin vətənini, torpağını sevən qəhrəmanımız ən uca zirvəyə – Şəhidlik zirvəsinə ucaldı. Biz həmişə qəhrəmanlarımızla fəxr etmişik. Elimdar kimi, vətənpərvər oğullarımızın qəhrəmanlıqları gələcək nəsillərə örnək olacaq.
Allah sənə rəhmət etsin şəhidim.
